पुणे : आमदार योगेश टिळेकर यांचे मामा सतीळ वाघ ( वय 58, रा. फुरसुंग, सासवड रस्ता ) यांच्या खुनाचा मुख्य सूत्रधार हा अक्षय जावळकर आहे. जावळकरला मोहिनी वाघनेच भरीस घातले, असे पोलीस तपासात समोर आले आहे. त्यांनी सतीश वाघ यांचा काटा काढण्यासाठी जादूटोण्याचा प्रयोग केल्याचा धक्कादायक प्रकार आरोपपत्रातून समोर आला आहे.
सतीश वाघ यांच्या हत्येप्रकरणी लष्कर न्यायालयात नुकतेच एक हजार पानांचे दोषारोपपत्र गुन्हे शाखेकडून दाखल करण्यात आले. अक्षय आणि मोहिनी वाघसह अतिश जाधव, पवन शर्मा, नवनाथ गुरसाळे आणि विकास शिंदे या सह जणांवर आरोपपत्र दाखल झाले आहे.
9 डिसेंबर 2024 रोजी सकाळी सतीश वाघ यांचे अपहरण करून पंधरा मिनिटांतच तब्बल 72 वार करून त्यांचा खून करण्यात आला होता. नंतर वाघ यांचा मृतदेह शिंदवणे घाटात फेकून दिला होता. सतीश वाघ यांच्या मुलाने दिलेल्या फिर्यादीनुसार हडपसर पोलीस ठाण्यात गुन्हा दाखल केलेला. घटनेचे गांभीर्य पाहता हा तपास पुढे हडपसर पोलिसांकडून गुन्हे शाखेकडे वर्ग करण्यात आला.
एक वर्षापासून खुनाचे नियोजन
सतीश वाघ यांचा खून करण्यासाठी एक वर्षापासून मोहिनी वाघ आणि अक्षय जवळकर हे दोघे नियोजन करत होते. घरात भेटता येत नसल्यामुळे दोघे एका लॉजवर भेटत असत. सतीश वाघ यांचा खून करण्यापूर्वी मोहिनी हिने एका मांत्रिक महिलेची देखील वाघ यांना आपल्या वाटेतून बाजूला करण्यासाठी मदत घेतली.
तीनवेळा रेकी केली, पण…
अक्षय याने सतीश यांच्या खुनाची सुपारी पवन शर्मा, नवनाथ गुरसाळे, विकास शिंदे या तिघांना दिली होती. त्यानुसार या तिघांनी वाघ यांची तब्बल तीन वेळा रेकी केली. सुरुवातीला दुचाकीवरून येऊन ठार मारण्याचे नियोजन केले. पण, परिसरातील गर्दी पाहता हे त्यांना शक्य झाले नाही.
दीड लाख अ‍ॅडव्हान्स पाठवला
सतीश वाघ यांचा काटा काढण्यासाठी पाच लाख रूपयांना ही सुपारी देण्यात आली होती. सुपारीतील एकही रूपयाही मोहिने वाघ हिने दिला नाही. अक्षय याने आपल्याकडील दीड लाख रूपये सुरूवातीला अ‍ॅडव्हान्स म्हणून शर्मा याच्या बँक खात्यावर पाठवले. शर्मा आणि त्याच्या साथीदारांनी सतीश यांचा खून केल्यावर त्याच दिवशी दुपारी सव्वातीनच्या सुमारास अक्षय याने राहिलेले तीन लाख रूपये शर्माला त्याच्या वाघोली येथील घरी नेऊन दिले.
सतीश वाघ यांचा बंदोबस्त करून उत्पन्न मोहिना वाघला हातात घ्यायचे होते
सतीश वाघ यांचा पाय तोडून त्यांना एक तर जागेवर बसवायचे किंवा त्यांचा खून करून वाटेतून कायमचे दूर करायचे होते. एकदा का सतीश यांचा बंदोबस्त झाला, की हॉटेल आणि खोल्यांचे भाडे, त्यातून मिळणारे सर्व उत्पन्न, मोहिनी हिच्या हातात येणार होते. त्यातूनच अक्षय आणि मोहिनी या दोघांनी मिळून सतीश यांचा पाच लाख रुपयांत सुपारी देऊन खून घडवून आणल्याचे पोलिसांच्या तपासात समोर आले.
2013 मध्ये जुळले सुत
मोहिनी वाघ आणि अक्षय जावळकर हे दोघे 2013 मध्ये एकमेकांच्या संपर्कात आले. अक्षय हा सतीश वाघ यांच्याकडे भाड्याने राहत होता. पुढे मोहिनी यांच्या मुलाला एका कॉलेजमध्ये प्रवेश मिळून देण्याच्या कारणातून दोघे आणखी जवळ आले. 2013 ते 2017 पर्यंत अक्षय हा मोहिनी हिच्याच घरी झोपायला असायचा. पण, 2017 मध्ये सतीश यांना आपली पत्नी मोहिनी आणि अक्षय या दोघांबाबत संशय आला. तेव्हापासून अक्षय याने मोहिनीचे घर सोडले. पुढे तो दुसरीकडे राहण्यास गेला. मात्र, त्यांच्यातील अनैतिक संबंध सुरूच होते. मोहिनी पती सतीश यांच्या त्रासाला वैतागली होती.
दहा रूपये खर्च करायचा अधिकारी मोहिनीला नव्हता
घरातील दहा रुपये देखील खर्च करण्याचा अधिकार मोहिनीला नव्हता. त्यामुळे काही करून सतीश यांचा काटा काढण्याचे मोहिनी अक्षय याला सांगत होती. अक्षय आणि मोहिनी या दोघांनी विचार पक्का केल्यानंतर त्यांनी सतीश यांचा काटा काढण्याची योजना आखली.