मुंबई : मराठा आरक्षणासाठी मनोज जरांगे पाटील हे जालना येथे उपोषणाला बसले आहेत. त्यापार्श्वभूमीवर राज्य सरकारने सर्वपक्षीयांची बैठक बोलावली होती. त्या बैठकीची माहिती देण्यासाठी आयोजित केलेल्या पत्रकार परिषदेचा एक व्हिडीओ व्हायरल झाला आहे. त्यावरून शिंदे-फडणवीस सरकारला विरोधकांनी लक्ष्य केले आहे. तर, व्हिडीओ क्लिप चुकीच्या पद्धतीने संपादित केल्याचे सांगत मुख्यमंत्री एकनाथ शिंदे यांनी विरोधकांचा निषेध केला आहे.
मराठा आरक्षणविषयक सर्वपक्षीय बैठकीनंतर सह्याद्री अतिथिगृह येथे पत्रकार परिषदेपूर्वी आपला आणि उपमुख्यमंत्री देवेंद्र फडणवीस, अजित पवार यांचा माईकवरील संवाद ‘सोशल मीडीया’वरून चुकीच्या पध्दतीने संपादित करुन फिरविणे अत्यंत खोडसाळपणाचे आहे.
मराठा आरक्षणाबाबत सरकार सुरुवातीपासून…— Eknath Shinde – एकनाथ शिंदे (@mieknathshinde) September 13, 2023
मराठा आरक्षणासाठी जालन्यातील अंतरवाली सराटी येथे मराठा मोर्चा समन्वयक मनोज जरांगे पाटील हे आपल्या सहकाऱ्यांसह बेमुदत उपोषणाला बसले आहेत. या पार्श्वभूमीवर राज्य सरकारने सोमवारी संध्याकाळी सर्वपक्षीय बैठक बोलावली होती. मनोज जरांगे यांनी उपोषण मागे घ्यावे, अशी विनंती सर्वपक्षीय नेत्यांनी केली आहे. याची माहिती मुख्यमंत्री एकनाथ शिंदे यांच्यासह उपमुख्यमंत्री देवेंद्र फडणवीस आणि उपमुख्यमंत्री अजित पवार यांनी एका पत्रकार परिषदेतून दिली.
हेही वाचा – आरक्षण देण्याची दानत नसेल तर तसे सांगा, पण किमान… ‘त्या’ व्हिडीओवरून ओमराजेंची टीका
मात्र, ही पत्रकार परिषद सुरू होण्यापूर्वी मुख्यमंत्री आणि दोन उपमु्ख्यमंत्र्यांमध्ये झालेल्या संवादाचा व्हिडीओ व्हायरल झाला आहे. त्यावरून विरोधकांनी सरकारवर निशाणा साधला आहे. ‘आपण बोलून मोकळं व्हायचं फक्त आणि निघून जायचं,’ असे बोलताना मुख्यमंत्री शिंदे दिसत आहेत. त्याला ‘हो, येस,’ म्हणून अजित पवार यांनी दुजोरा दिला आहे. तर, देवेंद्र फडणवीस यांनी, समोरील माइक सुरू असल्याबद्दल मुख्यमंत्र्यांना सावध केल्याचे या व्हिडीओमध्ये दिसत आहे.
पण आता खुद्द मुख्यमंत्री शिंदे यांनी ट्वीट करत, या व्हिडीओसाठी विरोधकांवर ठपका ठेवला आहे. मराठा आरक्षणविषयक सर्वपक्षीय बैठकीनंतर सह्याद्री अतिथिगृह येथे पत्रकार परिषदेपूर्वी आपला आणि उपमुख्यमंत्री देवेंद्र फडणवीस, अजित पवार यांचा माइकवरील संवाद ‘सोशल मीडीया’वरून चुकीच्या पद्धतीने संपादित करून फिरविणे अत्यंत खोडसाळपणाचे असल्याचे त्यांनी म्हटले आहे.
हेही वाचा – मुख्यमंत्री, उपमुख्यमंत्री पवार घेणार मनोज जरांगेंची भेट; उपोषण सोडण्याची करणार विनंती
मराठा आरक्षणाबाबत सरकार सुरुवातीपासून संवेदनशील असून कायद्याच्या चौकटीत बसेल असे आरक्षण देण्याबाबत सरकार प्राधान्याने काम करीत आहे. तसेच मराठा आरक्षणाबाबत पहिल्यांदाच अशा सर्वपक्षीय नेत्यांना एकत्र बोलावून याविषयी त्यांचे एकमत घेण्यात आले आहे. शासनाने इतकी चांगली भूमिका घेतली असताना मुद्दामहून काही विरोधक खोडसाळपणे आणि व्हिडीओ क्लिप चुकीच्या पद्धतीने संपादित करून लोकांच्या मनात गैरसमज पसरविण्याचे काम करीत आहेत हे अतिशय निंदनीय आहे, असे त्यांनी म्हटले आहे.
एकमेकांमधील आमच्या संवादाची मोडतोड करून, तो संपादित करून या घटकांनी जाणीवपूर्वक निंदनीय कृत्य केले आहे. शासन एकीकडे या संवेदनशील विषयावर ठोस भूमिका आणि निर्णय घेत आहे. अशा पार्श्वभूमीवर समाजात सोशल मीडियातून गैरसमज निर्माण करण्याचा कृत्याचा निषेध करावा तेवढा कमीच आहे, असे त्यांनी या ट्वीटमध्ये नमूद केले आहे.
