महापालिका कर्मचार्यांवर आता करोनाने हल्ला करणे सुरू केले असून नगररचना व विद्युत विभागांपाठोपाठ आता डॉ. झाकीर हुसेन रुग्णालयात दोन दिवसांत तब्बल १० कर्मचार्यांचा करोना रिपोर्ट पॉझिटिव्ह आला. त्यात ३ सुरक्षा रक्षक, ३ सिस्टरसह, ब्रदर, क्लर्क, वॉर्डबॉय आणि शववाहिका चालकाचा समावेश आहे. त्यामुळे कर्मचार्यांमध्ये चिंतेचे वातावरण आहे. एरवी रुग्ण आढळल्यास संबंधित ऑफिसच्या कर्मचार्यांना क्वारंटाईन केले जाते. हाच न्याय झाकीर हुसेन रुग्णालयातील कर्मचार्यांना लागू व्हावा, अशी मागणी यानिमित्ताने पुढे आली आहे. रुग्णालयातील कर्मचारीच करोनाचे रुग्ण बनले तर या आजाराशी लढा कोण देणार, असाही प्रश्न उपस्थित होत आहे.
महापालिकेतील नगररचना विभागात एका कर्मचार्याचा करोना रिपोर्ट पॉझिटिव्ह आल्याने खळबळ उडाली आहे. महापालिकेत नगररचना विभागात सर्वाधिक गर्दी असते. त्यात हा कर्मचारी शिपाई असल्याने त्याचा संपर्क या विभागातील सर्वच अधिकारी व कर्मचार्यांशी आला आहे. त्यामुळे आता नगररचना विभागातील कोण-कोण क्वारंटाईन होते याकडे सर्वांचे लक्ष लागून आहे. हा ‘मलाईदार’ विभाग असल्याचे बोलले जाते. त्यामुळे आपण क्वारंटाईन होऊ नये म्हणून काही कर्मचारी देव पाण्यात बुडवून असल्याचे समजते. याशिवाय पश्चिम विभागातील विद्युत विभागातील एक चालक पॉझिटिव्ह आला आहे. या चालकासोबत काम करणार्या तिघा कर्मचार्यांना क्वारंटाईन करण्यात आले आहे. त्याचप्रमाणे काही दिवसांपूर्वी मोरवाडी येथील रुग्णालयातील रुग्णवाहिकेचा चालक तसेच, तेथील एक सिस्टरचाही रिपोर्ट पॉझिटिव्ह आला होता. महापालिकेची मदार ज्या रुग्णालयावर आहे त्या डॉ. झाकीर हुसेन रुग्णालयातील कर्मचार्यांचेही रिपोर्ट पॉझिटिव्ह येत आहेत. काही दिवसांपूर्वी येथील सुरक्षाक्षकाचा रिपोर्ट पॉझिटिव्ह आला होता. त्यानंतर एक महिला कर्मचार्याचा रिपोर्ट पॉझिटिव्ह आला. महिलेच्या कुटुंबातील सात सदस्यांना करोनाची लागण झाल्याचे कळते. मंगळवारी सकाळी शववाहिका चालक, तर दुपारी तीन सुरक्षा सुरक्षारक्षकांसह, क्लर्क, मेट्रन व वॉर्डबॉयचा रिपोर्ट पॉझिटिव्ह आला. तसेच, एक पुरुष कर्मचार्याचाही रिपोर्ट पॉझिटिव्ह आला आहे. त्यामुळे करोनाचा विळखा आता या रुग्णालयातील कर्मचार्यांनाही बसत असल्याचे विदारक चित्र आहे.
असुविधांच्या गर्तेत कर्मचारी
डॉ. झाकीर हुसेन रूग्णालयात जीव धोक्यात घालून कार्यरत महापालिका, राष्ट्रीय शहरी आरोग्य अभियानाच्या कर्मचार्यांना पुरेशा सोयी-सुविधादेखील मिळत नसल्याचे दिसून येते. वरिष्ठ अधिकार्यांच्या दुर्लक्षाचा फटका आता कर्मचार्यांना बसत आहे. पुरूष कक्षाजवळ डॉक्टर, परिचारिका यांना वेगळी व्यवस्था फार पूर्वीपासून असतानाच त्याठिकाणी सुरुवातीला करोनासाठी काम करणार्या परिचारिकांना दाखल करण्याची व्यवस्था करण्यात आली होती. कर्मचार्यांना देण्यात आलेल्या रूमदेखील काढून घेण्यात आल्या. महिला परिचारिकांच्या समस्या लक्षात घेऊन त्यांना रूम देण्यासंदर्भात सातत्याने महिला व पुरुष परिचारिकांनी पाठपुरावा करुनदेखील कुठलीही उपाययोजना करण्यात आलेली नाही. महत्वाचे म्हणजे समूूह संसर्गाचा धोका लक्षात घेऊन रूग्णांना सुविधा देण्यात आल्या. परंतु, समुहात करोनासाठी काम करणार्या परिचारिकांकडे दुर्लक्ष करण्यात येत असल्याची तक्रारही कर्मचारी वर्गाकडून केली जात आहे. याशिवाय तृतीय श्रेणी कर्मचार्यांची संख्या अतिशय तुटपूंजी आहे. त्यामुळे रुग्णालयात आरोग्य सेवा करणार्या कर्मचार्यांना हे काम करावे लागते.
अन्य कर्मचार्यांनाही जबाबदारी द्या
नाशिक महापालिकेची संपूर्ण मदार डॉ. झाकीर हुसेन रुग्णालयावरच आहे. कोणत्याही विषाणूजन्य आजाराची साथ आल्यास या रुग्णालयाचाच वापर केला जातो. गेल्यावर्षापर्यंत या रुग्णालयात स्वाईन फ्लूचा कक्ष होता. त्यापूर्वी डेंग्यूचा कक्ष स्थापन करण्यात आला होता. परिणामी रुग्णालयातील कर्मचार्यांवर सातत्याने कामाचा ताण असतो, असे सांगितले जाते. गेल्या तीन महिन्यांपासून येथील कर्मचारी अव्याहतपणे काम करत आहेत. या कर्मचार्यांना काही दिवसांसाठी आराम देऊन किंवा इतर हॉस्पिटलमध्ये त्यांच्या बदल्या करुन अन्य रुग्णालयातील कर्मचार्यांना आता झाकीर हुसेन हॉस्पिटलची जबाबदारी द्यावी, अशी मागणीही पुढे येत आहे.
कर्मचार्यांचा उपयोग डाटा एण्ट्रीसाठी
रुग्णालयात प्रत्येकी २० हजारांचा पगार देऊन नव्याने कर्मचार्यांची भरती केली. मात्र, या कर्मचार्यांचा उपयोग डाटा एण्ट्रीसाठी होतोे. डाटा एण्ट्रीसाठी महापालिकेतील अन्य विभागातील कर्मचार्यांचाही उपयोग होऊ शकतो. या नवीन कर्मचार्यांना आरोग्यसेवेचीच जबाबदारी द्यावी, अशी मागणी करण्यात आली आहे.
