Coronavirus Update: २४ तासांत राज्यात २४३६ कोरोना रुग्णांची नोंद; तर ६० जणांचा मृत्यू

आज पुन्हा राज्यात कोरोनाग्रस्त रुग्णांचा आकडा वाढला असून तब्बल २ हजार ४३६ नव्या रुग्णांची नोंद झाली आहे. त्यामुळे राज्यातल्या एकूण कोरोनाग्रस्तांचा आकडा आता ५२ हजार ६६७ झाला आहे. त्यासोबतच राज्यात आज दिवसभरात ६० कोरोनाबाधितांचा मृत्यू झाला आहे. त्यामुळे मृतांचा आकडा १६९५ झाला आहे. चौथ्या लॉकडाऊनमध्ये अनेक नियम शिथिल केल्यानंतर अजूनही रुग्णांची संख्या कमी न होता वाढतच असल्यामुळे प्रशासकीय यंत्रणांसाठी हे एक मोठं आव्हान ठरलं आहे. त्यादरम्यान, बरे होऊन घरी जाणाऱ्या रुग्णांच्या संख्येत मात्र आज भर पडली आहे. आज दिवसभरात ११८६ रुग्ण बरे होऊन घरी परतले आहेत. त्यामुळे बऱ्या झालेल्या रुग्णांचा आकडा १५ हजार ७८६ झाला आहे.

कोरोना रुग्णांची सविस्तर आकडेवारी

सर्वाधिक मृत्यू मुंबईत

राज्यात ६० करोना बाधित रुग्णांच्या मृत्यूची नोंद आज झाली आहे. आज झालेल्या मृत्यूपैकी मुंबई मध्ये ३८, पुण्यात ११, नवी मुंबईत ३, ठाणे शहरात २, औरंगाबाद शहरात २, सोलापूरात १, कल्याण डोंबिवलीमध्ये १, रत्नागिरीमध्ये १ मृत्यू झाले आहेत. याशिवाय बिहार मधील एका व्यक्तीचा मृत्यू मुंबईमध्ये झाला आहे. आज नोंद झालेल्या मृत्यूंपैकी ४२ पुरुष तर १८ महिला आहेत. आज झालेल्या ६० मृत्यूपैकी ६० वर्षे किंवा त्यावरील २७ रुग्ण आहेत तर २९ रुग्ण हे वय वर्षे ४० ते ५९ या वयोगटातील आहेत. तर ३ जण ४० वर्षांखालील आहे. या ६० रुग्णांपैकी ४७ जणांमध्ये ( ७८ %) मधुमेह, उच्च रक्तदाब, हृदयरोग, अशा स्वरुपाचे अतिजोखमीचे आजार आढळले आहेत. कोविड १९ मुळे राज्यात झालेल्या मृत्यूंची संख्या आता १६९५ झाली आहे.