Coronavirus Update: आज राज्यात २७०१ कोरोना रुग्णांची नोंद; तर ८१ जणांचा मृत्यू

माजी मुख्यमंत्री देवेंद्र फडणवीस यांनी घेतलेल्या आक्षेपांनंतर राज्यातल्या कोरोना मृतांमध्ये आज १३२८ अतिरिक्त मृत्यूंची नोंद झाली आहे. लॉकडाऊनचे नियम शिथिल केल्यानंतर राज्यात मिशन बिगीन अगेन सुरू झाल्यापासून कोरोनाबाधितांची संख्या सातत्याने वाढत आहे. याशिवाय अनेक ठिकाणी पुन्हा नव्याने रुग्ण सापडल्याच्या देखील घटना समोर आल्या आहेत. आज दिवसभरात राज्यात २७०१ नव्या रुग्णांची नोंद झाली आहे. त्यामुळे राज्यातल्या कोरोनाबाधितांचा आणि कोरोना रुग्णांचा एकूण आकडा १ लाख १३ हजार ४४५ इतका झाला आहे. याशिवाय, ८१ कोरोना रुग्णांचा आज उपचारांदरम्यान मृत्यू झाला आहे. त्यामुळे आजचे ८१ आणि याआधीचे समाविष्ट करण्यात आलेले १३२८ अशा एकूण १४०९ मृत्यूंची आज नव्याने भर पडली आहे. त्यामुळे राज्यातल्या एकूण मृतांचा आकडा ५ हजारांच्या वर गेला असून ५ हजार ५३७ इतका झाला आहे. यासोबतच राज्यात आज दिवसभरात १८०२ रुग्ण बरे होऊन घरी परतले आहेत. त्यामुळे एकूण घरी परतलेल्या रुग्णांचा आकडा देखील ५७ हजार ८५१वर पोहोचला आहे. राज्यात सद्यघडीला एकूण ५० हजार ०४४ अॅक्टिव्ह कोरोना रुग्ण आहेत.

कोरोनाबाधितांची सविस्तर आकडेवारी

आज राज्यात ८१ कोविड १९ मृत्यू झाले आहेत. याशिवाय आज मुंबईतील ८६२ आणि उर्वरित राज्यातील ४६६ अशा एकूण १३२८ जुन्या मृत्यूंची नोंद घेण्यात येत आहे.