नाशिक : गिरणा अ‍ॅग्रो कंपनीच्या माध्यमातून शिंदे गटाचे मंत्री दादा भुसे यांनी शेतकर्‍यांची फसवणूक केल्याचा आरोप शिवसेना उध्दव ठाकरे गटाचे खासदार संजय राऊत यांनी मालेगावमधील सभेत केला होता. आता मंत्री भुसे हे मालेगावमध्ये मेळाव्याच्या माध्यमातून खासदार राऊतांच्या आरोपांना प्रत्युत्तर देणार असून, १६ सप्टेंबर रोजी मालेगाव येथे आयोजित या मेळाव्याला राऊत यांनीही उपस्थित राहावे, असे आव्हान मंत्री भुसेंनी राऊतांना दिले आहे.
शिवसेनेतून शिंदे गट बाहेर पडल्यानंतर महाराष्ट्राच्या राजकारणात चांगलीच उलथापालथ झाली. यानंतर शिवसेना उद्धव ठाकरे गटाचे खासदार संजय राऊत यांच्याकडून अनेकांवर आरोप करण्यात आले होते. नाशिकचे पालकमंत्री दादा भुसे यांच्यावरही गिरणा अ‍ॅग्रो कंपनीत घोटाळा केल्याचा आरोप संजय राऊत यांनी ट्विट करत केला होता. गिरणा अग्रो नावाने 178 कोटी 25 लाखांचे शेअर्स शेतकर्‍याकडून गोळा केले. पण कंपनीच्या वेबसाईटवर केवळ 1 कोटी 67 लाखांचे शेअर्स केवळ 47 सभासदांच्या नावावर दाखवले. ही लूट आहे. लवकरच स्फोट होईल, अशा आशयाचे ट्विट केले होते. यावर मंत्री भुसे यांनी प्रत्युत्तर दिले.
भुसे म्हणाले, गेल्या दहा-बारा वर्षात मालेगाव तालुक्यातील गिरणा सहकारी साखर कारखाना डीआरटी कोर्टच्या माध्यमातून जाहीर लिलावाद्वारे त्याची विक्री झाली होती. त्या विक्रीच्या काळात मालेगाव तालुक्यातील प्रत्येक गावामध्ये जाऊन प्रत्येक सर्वपक्षीय पदाधिकार्‍यांनी शेअर्स गोळा केले होते. दुर्दैवाने मोठी रक्कम उभी राहू शकली नाही. त्यावेळी जमा झालेली रक्कम भुजबळांंच्या आर्मस्ट्राँग कंपनीला आरटीजीएस केली होती, असे भुसे म्हणाले. यासंदर्भात 16 सप्टेंबर रोजी सर्व सभासदांची बैठक आयोजित केल्याचे भुसेंनी स्पष्ट केले. ज्यांनी आरोप केले, त्या मुंबईच्या भोंग्याला व ज्या स्थानिक भुंग्यांनी चुकीची माहिती दिली त्यांनीही या बैठकीला उपस्थित राहावे, अशा शब्दांत ठाकरे गटाचे नेते राऊत व उपनेते अद्वय हिरे यांचे नाव न घेता भुसेंनी त्यांना आव्हान दिले.
