ठाणे: शीळफाटा, शीळ- दिवा या ठिकाणी हनुमान हॉटेल समोर भूमिगत असलेल्या टोरंट पॉवरची विद्युत केबल व ट्रान्सफॉर्मरला शुक्रवारी सकाळी सहा वाजून २० मिनिटांच्या सुमारास आग लागली. आग लागलेल्या ट्रान्सफॉर्मरचा अचानक स्फोट झाला. त्याचा फटका बाजूला असलेल्या आर. के. टायर या दुकानाला बसून आग लागल्याने दुकानात झोपलेला ३५ वर्षीय विशाल सिंग यांचा होरपळून जागीच मृत्यू झाला. तर आणखी एक जण जखमी झाला आहे. त्याचे नाव समजू शकले नाही. ही घटना पनवेलकडून मुंब्र्याकडे येणाऱ्या मार्गिकेवर घडली आहे. त्यामुळे वाहतूकीवर मोठ्या प्रमाणात परिणाम झाला आहे, अशी माहिती आपत्ती व्यवस्थापन कक्षाने दिली.
जवळपास १० तासांहून अधिक काळ आगीवर नियंत्रण मिळविण्याचे शर्थीचे प्रयत्न सुरूच आहेत. एकीकडे आगीवर नियंत्रण मिळविण्यासाठी फोम आणि पाण्याचा मारा केल्यावर दुसरीकडे आग भडकत आहे. तसेच या स्फोटात भूमिगत असलेली डिझेल पाईपलाईनला धक्का बसून तिच्यातून गळती सुरू झाल्याने आगीवर नियंत्रण मिळविण्यात यश येत नाही. दरम्यान या आगीबरोबर धूर ही मोठ्या प्रमाणात पसरत आहे. या घटनेचा वाहतूक कोंडीवर परिणाम झाल्याचे दिसत आहे. तर घटनास्थळी संबंधीत विभागाने पाईपलाईनला गळती लागल्याचे स्पष्ट केल्याची माहिती ठाणे महापालिका प्रादेशिक आपत्ती व्यवस्थापन अधिकाऱ्यांनी दिली.
शिळफाटा येथे विद्युत केबल आणि ट्रान्सफॉर्मरला आग लागल्याची माहिती मिळताच घटनास्थळी डायघर पोलीस, टोरंट पॉवर विद्युत, आपत्ती व्यवस्थापन, आपत्ती प्रतिसाद दल आणि अग्निशमन दल या विभागांनी तातडीने धाव घेतली. लागलेली आगीवर नियंत्रण मिळविण्यासाठी अग्निशमन दलाचे जवान आपत्ती व्यवस्थापन विभागाचे कर्मचारी यांच्यामार्फत प्रयत्न सुरू केले आहेत.
तर दुसरीकडे नाल्यावरील सिमेंट काँक्रीटकरण उडाले. त्यावेळी तेथून रिक्षा नेणारा रिक्षाचालक ही त्यामध्ये जखमी झाला आहे. ही बाब स्थानिकांच्या लक्षात येताच त्यांनी त्या जखमी रिक्षाचालकाला रुग्णालयात उपचारार्थ दाखल केले आहे. जवळपास दहा तासांहून अधिक काळ आग सुरू आहे. आगीवर नियंत्रण मिळविण्यासाठी किती वेळ लागले हे अजून स्पष्ट करण्यात आलेले नाही. या आगीमुळे धूर मोठ्या प्रमाणात पसरत आहे.
दरम्यान ही आग नियंत्रणात येत नसल्याने भूमिगत असलेली डिझेल पाईपलाईनला गळती लागली असावी अशी शक्यता वर्तविण्यात आली होती. त्यानुसार संबंधित विभाग घटनास्थळी दाखल झाले, त्यांच्या मार्फत तपासणी करण्यात आली. डिझेल पाईपलाईनला स्फोटाचा धक्का बसला असल्याचे स्पष्ट झाले. त्यादृष्टीने उपाययोजना करण्याचे काम सुरू आहे. त्यातच आगीवर नियंत्रण मिळविण्यासाठी अग्निशमन दलाचे जवान ५ फायर वाहन व ६ वॉटर टँकर व १ रेसक्यू वाहन घटनास्थळी दाखल झाले आहे.
