बुलडाण्यामध्ये आजोबा आणि त्यांचा नातू या दोघांचेही मृतदेह गूढ अवस्थेत आढळून आले. पार्डी येथील रामचंद्र अंभोरे (६०) आणि त्यांचा नातू रवी अंभोरे (१७) हे त्यांच्या तुरीच्या खळ्यावर राखणीसाठी रात्री मुक्कामी गेले होते. दुसऱ्या दिवशी सकाळी अंभोरे यांच्या डोक्यात दगड मारण्यात आल्याने त्यांचा मृत्यू झाल्याचं तर रवीने गळफास लावल्याचं भयानक चित्र समोर आलं.
रामचंद्र अंभोरेंचा मुलगा अनिल शेतात गेला असता त्याला हे विदारक दृष्य दिसले. याविषयी त्याने तातडीने स्थानिक पोलिसांना माहिती दिली. माहिती मिळताच पोलिस त्वरित घटनास्थळी दाखल झाले. पोलिसांनी घटनास्थळाचा पंचनामा केला. दरम्यान, याप्रकरणामागे नक्की कोणाचा हात आहे? ही हत्या आणि आत्महत्येची केस आहे का या दोन्ही हत्यांमागे तिसऱ्या व्यक्तीचा हात आहे? याचा पोलीस तपास करत आहेत. दोन्ही मृतदेह जवळच्या रुग्णालयात शवविच्छेजनासाठी पाठवण्यात आले असून, मुलगा आणि वडील गमावलेल्या अनिल अंभोरेंचीही पोलीस चौकशी करणार आहेत.