गुजरात विधानसभा निवडणुकीत भाजपाने एकहाती सत्ता काबीज केली आहे. यामुळे गुजरातमध्ये आता भाजपकडून विजयाचा आनंद साजरा केला जात आहे. या निवडणुकीत भारताचा स्टार क्रिकेटर रवींद्र जडेजाची पत्नी रिवाबा देखील जामनगर उत्तर मतदारसंघातून विजयी झाल्या आहेत. पत्नीच्या विजयावर जडेजा खूपचं आनंदी दिसत असून त्याने सोशल मीडियावर रिवाबाबद्दल एक पोस्ट टाकली आहे. या ट्विटमध्ये जडेजाने रिवाबाचे अभिनंदन करण्यासोबतच जामनगरच्या लोकांचे आभार मानले आहेत.
जडेजाने ट्विटमध्ये लिहिले की, ‘नमस्कार आमदारजी. या विजयासाठी तुम्ही खरोखरच पात्र आहात. जामनगरच्या जनतेचा विजय झाला आहे. मी सर्व लोकांचे मनापासून आभार व्यक्त करतो. आशापुरा मातेला विनंती आहे की, जामनेरची कामे खूप चांगली होतील. जय माताजी.
Hello MLA you truly deserve it. જામનગર ની જનતા નો વિજય થયો છે. તમામ જનતા નો ખુબ ખુબ દીલથી આભાર માનુ છુ. જામનગર ના કામો ખુબ સારા થાય એવી માં આશાપુરા ને વિનંતી. જય માતાજી🙏🏻 #મારુજામનગર pic.twitter.com/2Omuup5CEW
— Ravindrasinh jadeja (@imjadeja) December 9, 2022
जडेजा बऱ्याच काळापासून क्रिकेटपासून दूर आहे. सप्टेंबरमध्ये त्याने आशिया चषकातील शेवटचा आंतरराष्ट्रीय सामना खेळला होता. मात्र तेव्हापासून तो दुखापतीमुळे संघाबाहेर आहे. या काळात जडेजाने पत्नीला जिंकवण्यासाठी पूर्ण ताकद लावली होती. त्याने निवडणूक प्रचारात सक्रिय सहभाग घेत रोड शोमध्येही दिसला.
या रोड शोदरम्यान जडेजाने त्याच्या चाहत्यांनाही ऑटोग्राफ देताना दिसला. विजयानंतर रिवाबाच्या रोड शोमध्ये जडेजाही उपस्थित होता. गुजरातमध्ये भाजपने 182 पैकी 156 जागा जिंकल्या. त्याचवेळी जामनगर उत्तरमधून रिवाबानेही मोठा विजय मिळवला. त्यांनी त्यांचे जवळचे प्रतिस्पर्धी आम आदमी पार्टीचे करशनभाई यांचा 50 हजारांहून अधिक मतांनी पराभव केला. रिवाबा यांना एकूण 88,835 मते मिळाली, तर आप उमेदवाराला 35,265 मते मिळाली. रिवाबाने पहिल्याच प्रयत्नात बाजी मारली.