बीड जिल्ह्यातील पिण्याच्या पाण्याचा प्रश्न सुटणार, गुलाबराव पाटलांची ग्वाही

परळी येथील जलकुंभसाठी निधी उपलब्ध करून देणार असून त्याचा आराखडा तयार करावा, जिल्ह्यात आवश्यक तिथे सोलर यंत्रणा उभी करण्यासाठी जागा निश्चित करावी. पिण्याच्या पाण्यासाठी बीड जिल्ह्याला निधीची कमतरता भासू देणार नाही असे त्यांनी स्पष्ट केलं आहे.

बीड जिल्ह्यातील पिण्याच्या पाण्याचा प्रश्न सुटणार, गुलाबराव पाटलांची ग्वाही

बीड जिल्ह्यामधील पिण्याच्या पाण्याचा प्रश्न सुटणार अशी ग्वाही पाणी पुरवठा मंत्री गुलाबराव पाटील यांनी दिली आहे. बीड जिल्ह्यातील नागरिकांच्या पिण्याच्या पाण्याची समस्या सोडविण्यासाठी जिल्ह्यातील 1 हजार 367 गावातील प्रत्येक कुटुंबाला पिण्याचे पाणी देण्याचे शासनाचे नियोजन आहे. यासाठी जिल्हा प्रशासनाने काटेकोर, विनाविलंब नियोजन करावे, जिल्ह्यात पाणी पुरवठा योजना नसलेल्या 101 गावांना प्राधान्य द्यावे, असे निर्देश पाणी पुरवठा व स्वच्छता मंत्री गुलाबराव पाटील यांनी दिले. पाण्याचा प्रश्न सोडवण्यासाठी आवश्यक निधी उपलब्ध करून दिला जाईल असेही गुलाबराव पाटील म्हणाले.

शिवसेना नेते आणि पाणी पुरवठा व स्वच्छता मंत्री गुलाबराव पाटील यांच्या अध्यक्षतेखाली बीड जिल्ह्यातील पिण्याच्या पाण्यासंदर्भात आढावा बैठक घेण्यात आली होती. यावेळी गुलाबराव पाटील म्हणाले, बीड जिल्ह्यातील जनतेच्या पिण्याचा पाण्याचा प्रश्न सोडविण्यासाठी जिल्हा प्रशासनाने मिशन मोडवर काम करावे. परळी येथील जलकुंभसाठी निधी उपलब्ध करून देणार असून त्याचा आराखडा तयार करावा, जिल्ह्यात आवश्यक तिथे सोलर यंत्रणा उभी करण्यासाठी जागा निश्चित करावी. पिण्याच्या पाण्यासाठी बीड जिल्ह्याला निधीची कमतरता भासू देणार नाही असे त्यांनी स्पष्ट केलं आहे. जल जीवन मिशन योजनेत महाराष्ट्र देशात अग्रेसर असून जल जीवन मिशन अंतर्गत राज्यातील एकही बांधव पिण्याच्या पाण्यापासून भविष्यात वंचित राहणार नाही, असा विश्वास त्यांनी यावेळी व्यक्त केला.

जिल्हा प्रशासनाने समन्वयाने काम करावे – मुंडे

सामाजिक न्याय मंत्री धनंजय मुंडे या बैठकीला उपस्थित होते. यावेळी त्यांनी असे सांगितले की, बीड जिल्ह्यातील पिण्याचा पाण्याचा सोडविण्यासाठी जिल्हा प्रशासनाने समन्वयाने काम करावे. जिल्ह्यातील 1 हजार 367 गावांतील पिण्याच्या पाण्याचा प्रश्न सोडविण्यासाठी जिल्हा प्रशासनाने काटेकोर नियोजन करणे अपेक्षित आहे. जिल्ह्यात 101 गावांना पाणी पुरवठा योजना नाही या गावांचा प्राधान्याने विचार करावा. नागरिकांना पुरेसे पिण्याचे पाणी मिळावे यासाठी शासन निधी द्यायला तयार असून यासाठी तांत्रिक मान्यता, प्रशासकीय मान्यता, कार्य आदेश, निविदा आदी प्रक्रिया विनाविलंब, बिनचूक पूर्ण कराव्यात.


हेही वाचा : जप्त केलेली संपत्ती खाली करा, ईडीची एकनाथ खडसेंना नोटीस