करोना विषाणूवर इलाज शोधण्यासाठी जगभरातून प्रयत्न होत असताना ऑस्ट्रेलियातील भारतीय वंशाच्या शास्त्रज्ञाने मोठे यश संपादन केले आहे. करोना विषाणूवरील लस बनवण्याच्या अगदी जवळ असल्याचा दावा एस. एस. वासन यांनी केला आहे. ऑस्ट्रेलियातील कॉमनवेल्थ सायंटिफिक अ‍ॅण्ड इंडस्ट्रीयल रिसर्च ऑर्गनायझेशनच्या (सीएसआ-यआरओ) एका हाय- सेक्युरिटी प्रयोगशाळेत ही लस तयार करण्यात येत आहे. करोना विषाणूने जगभरात आतापर्यंत ६१८ जणांचे बळी घेतले असून सर्वाधिक मृतांची संख्या चीनमध्ये आहे.
करोनाच्या विषाणूचे विलगीकरण करण्यात यश आल्यामुळे आता करोनावरील लस शोधणे सहज शक्य होणार आहे. सीएसआयआरओच्या पॅथोजन्स गटाचे प्रमुख असलेले प्राध्यापक एस. एस. वासन यांनी सांगितले की, करोनाचा संसर्ग झालेल्या एका व्यक्तीकडून या विषाणूचा नमून्यापासून हा विषाणू वेगळा करण्यात ऑस्ट्रेलियाच्या डॉर्टी इंस्टिट्यूटच्या संशोधकांनी गेल्याच आठवड्यात यश मिळवले होते. सीएसआयआरओमध्ये या विषाणूचा विकास पाहता प्री-क्लिनिकल अभ्यासासाठी विषाणू मोठ्या संख्येने उपलब्ध व्हायला हवेत असे अनुमान काढण्यात आले आहे. वेगळा करण्यात आलेला हा विषाणू आम्हाला दाखवण्यात आला आहे.
ऑस्ट्रेलियन अ‍ॅनिमल हेल्थ लॅबमध्ये माझे सहकारी देखील निदान, निरीक्षण आणि प्रतिक्रियेवर काम करत असल्याची माहिती, वासन यांनी दिली. आमची प्रयोगशाळा या विषाणूंची संख्या वाढवण्याच्या प्रयत्नात असल्याचेही वासन म्हणाले. मात्र, त्यांच्या प्रयोगशाळेत करोना विषाणूंची संख्या किती हे त्यांनी स्पष्ट केले नाही. जगभरात करोना विषाणूवर औषध तयार करण्याचे प्रयत्न सुरू असून त्यावर प्राध्यापक वासन म्हणाले की, प्री-क्लिनिकल अभ्यासासाठी आवश्यक लस उपलब्ध करण्याबरोबर यामुळे आता औषध तयार करण्याच्या प्रयत्नांनाही गती मिळेल.
