कोरोना बळींच्या संख्येत महाराष्ट्राने इटलीला टाकलं मागे, जागतिक क्रमवारीत ६व्या स्थानी

राज्यात कोरोना विषाणूचा फैलाव सातत्याने वाढताना दिसत आहे. जरी राज्यातील रुग्ण बरे होण्याचे प्रमाण वाढत असले तरी मृत्यूदर काही कमी होताना दिसत नाही आहे. जागतिक क्रमवारीत कोरोना बळींच्या संख्येत राज्य सहाव्या क्रमांकावर आहे. राज्यातील कोरोना बळींच्या संख्येने इटलीला मागे टाकले आहे. गेल्या २४ तासांत राज्यात १८ हजार ३१७ नवे कोरोनाबाधित रुग्ण आढळले असून ४८१ कोरोनाबाधित रुग्णांच्या मृत्यूची नोंद झाली आहे. त्यामुळे राज्यातील कोरोनाबाधितांचा आकडा १३ लाख ८४ हजार ४४६वर पोहोचला. यापैकी आतापर्यंत ३६ हजार ६६२ रुग्णांचा मृत्यू झाला असून सध्या राज्यातील मृत्यूदर २.६५ टक्के एवढा आहे.

आज दिवसभरात राज्यात १९ हजार १६३ रुग्ण बरे होऊन घरी गेले असून आतापर्यंत एकूण १० लाख ८८ हजार ३२२ रुग्ण कोरोनामुक्ता झाले आहेत. यामुळे राज्यातील रुग्ण बरे होण्याचे प्रमाण (Recovery Rate) ७८.६१ टक्के एवढे झाले आहे. आजपर्यंत तपासण्यात आलेल्या ६७ लाख ८५ हजार २०५ प्रयोगशाळा नमुन्यांपैकी १३ लाख ८४ हजार ४४६ (२०.४०टक्के) नमुने पॉझिटिव्ह आले आहेत. सध्या राज्यात २१ लाख ६१ हजार ४४८ व्यक्ती होमक्वारंटाईनमध्ये आहेत तर २९ हजार १७८ व्यक्ती संस्थात्मक क्वारंटाईनमध्ये आहेत. तसेच सध्या राज्यात २ लाख ५९ हजार ३३ रुग्णांवर उपचार सुरू आहेत.

राज्यातील जिल्हा आणि मनपानिहाय रुग्णांचा तपशील पुढील प्रमाणे…