Mahayuti Government : मुख्यमंत्री देवेंद्र फडणवीसांच्या नेतृत्वात पहिली कॅबिनेट पार
मुंबई : राज्याच्या नव्या सरकारचा पहिला शपथविधी सोहळा पार पडला आहे. देवेंद्र फडणवीस यांनी मुख्यमंत्रिपदाची तर एकनाथ शिंदे आणि अजित पवार यांनी उपमुख्यमंत्रिपदाची शपथ घेतली आहे. “महाराष्ट्र आता थांबणार नाही” अशी घोषणा केलेल्या महायुतीच्या सरकारमधील तिन्ही नेत्यांनी शपथ घेतल्याच्या तासाभरातच मंत्रालयात जाऊन आपला पदभार स्वीकारला. तर याचवेळी या तिघांची पहिली कॅबिनेट सुद्धा पार पडली आहे. कॅबिनेटमध्ये देवेंद्र फडणवीसांनी वैद्यकीय मदतीच्या फाइलवर पहिली सही केली. याच्या माध्यमातून त्यांनी पुण्याच्या रुग्णाला पाच लाखांची मदत केली असून चंद्रकांत कुऱ्हाडे यांना मुख्यमंत्री सहाय्यता निधीतून हे अर्थसहाय्य देण्यात आले आहे.
मंत्रालयातील सहाव्या मजल्यावर असलेल्या दालनात मुख्यमंत्री देवेंद्र फडणवीस यांच्या नेतृत्वात आणि उपमुख्यमंत्री एकनाथ शिंदे आणि उपमुख्यमंत्री अजित पवार यांच्या उपस्थितीत पहिली कॅबिनेट पार पडली.
यावेळी राज्याच्या मुख्य सचिव सुजाता सौनिक यांनी मुख्यमंत्री फडणवीस आणि दोन्ही उपमुख्यमंत्र्यांचे पुष्पगुच्छ देऊन स्वागत केले.
मंत्रालयात पोहोचताच मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री अजित पवार यांनी छत्रपती शिवाजी महाराज, भारतरत्न डॉ. बाबासाहेब आंबेडकर आणि महात्मा ज्याोतिबा फुले यांच्या प्रतिमेला नमन केले.
मुख्यमंत्री देवेंद्र फडणवीस उपमुख्यमंत्री एकनाथ शिंदे आणि उपमुख्यमंत्री अजित पवार यांनी मंत्रालयात असलेल्या संविधानाच्या प्रतिमेलाही अभिवादन केले.
महत्त्वाची बाब म्हणजे शपथविधीच्या तासाभरातच मंत्रालयातील फडणवीसांच्या कार्यालयाबाहेरील पाटी बदलण्यात आली असून उपमुख्यमंत्रीपदाची पाटी बदलून आता तिथे ‘देवेंद्र सरिता गंगाधरराव फडणवीस – मुख्यमंत्री’ अशी पाटी लावण्यात आली आहे.
