निळवंडे धरणावरील उपसा सिंचन योजनांचे सर्वेक्षण होणार, मंत्री शंकरराव गडाख यांची माहिती

अहमदनगर (Ahmednagar) जिल्ह्यातील संगमनेर ( Sangamner) तालुक्यांतील मुळा धरणाच्या जलाशय (Reservoir) / नदीवरील आणि निळवंडे धरणाच्या डाव्या व उजव्या कालव्यावरील एकुण १७ उपसासिंचन योजनांचे प्राथमिक सर्वेक्षण करण्यात येणार असून यासाठी २ कोटी ३७ लाखांहून अधिक निधी उपलब्ध करुन देण्यात येणार असल्याची माहिती मृद आणि जलसंधारण मंत्री शंकरराव गडाख (Shankarrao Gadakh) यांनी बुधवारी दिली. या निधीतून १०१ ते ६०० हेक्टर सिंचन क्षमता असलेल्या १७ योजनांसाठी एकूण ३,९०० हेक्टरचे सर्वेक्षण करण्यात येणार आहे.

योजनांचे सर्वेक्षण करण्याबरोबरच उपसा सिंचना योजनांच्या कामासाठी निधी उपलब्ध होण्याबाबतची मागणी वेळोवेळी करण्यात येत होती.त्यामुळेच उपसा सिंचन योजनांची क्षेत्रीय प्राथमिक पाहणी करण्यात आली आहे.

अहमदनगर जिल्हयातील संगमनेर तालुक्यातील शिंदोडी, मांडवे, बिरेवाडी, खरशिंदे, साकुर, वरवंडी, पेमगिरी, शिरापूर, डिग्रस, पारेगाव खु. व बु. , तिगाव, काकडवाडी, करुले, क-हे, निमोन, व सोनोशी या १७ गावातील अवर्षण प्रवण क्षेत्राचा समावेश आहे. या भागात उपसा सिंचन झाल्यास पिण्याचा तसेच शेतीच्या पाण्याचा प्रश्न सुटणार आहे, असे गडाख यांनी सांगितले.

२५१ ते ६०० हेक्टर सिंचन क्षमता असलेल्या १८०० हेक्टरचे सर्वेक्षण करण्यासाठी ९६ लाख ९८ हजार १४१ रुपयांची तरतूद करण्यात आली आहे. तर १०१ ते २५० हेक्टर सिंचन क्षमता असलेल्या २१०० हेक्टरचे सर्वेक्षण करण्यासाठी १ कोटी ४० लाख ३३ हजार रुपयांची तरतूद करण्यात आल्याची माहिती त्यांनी दिली.

सर्वेक्षणानंतर करण्यात येणाऱ्या अहवालामध्ये प्रामुख्याने नलिका प्रणालीचे सखोल संकल्पन केल्यानंतर अहवाल सादर करण्यात येईल. याशिवाय नदीपात्र, नदीकाठ ते जॅक वेल तसेच संपूर्ण नलिक वितरणाचे तलांक नकाशावर दर्शविण्यात येतील.


हेही वाचा : यासिन मलिकला जन्मठेप, एनआयएच्या विशेष कोर्टाचा निर्णय