वसतीगृहात विद्यार्थीनीची गळा दाबून हत्या

बुधवारी (आज) औरंगबादमध्ये वैद्यकीय शिक्षण घेणाऱ्या विद्यार्थिनीची गळा दाबून हत्या करण्यात आल्याची धक्कादायक घटना समोर आली. मृत विद्यार्थीनी महात्मा गांधी मिशन महाविद्यालयाच्या वसतीगृहात राहत होती. हत्येच्या या प्रकरणामुळे शहरात खळबळ माजली असून, सिडको पोलीस घटनेचा तपास करत आहेत. मृत तरूणीचे नाव आकांक्षा अनिल देशमुख (२२) असून, ती बीडच्या माजलगावची रहिवाशी असल्याची माहिती समोर आली आहे. एमजीएमच्या फिजिओथेरपी महाविद्यालयामध्ये आकांक्षा मास्टर्स ऑफ फिजिओथेरपीच्या प्रथम वर्षात शिकत होती. तपासकर्त्यांनी दिलेल्या माहितीनुसार, एमजीएममधील मुलींच्या वसतिगृहात आकांक्षा चौथ्या मजल्यावरील खोलीमध्ये राहत होती. तिच्यासोबत २ खोलीत अन्य दोन विद्यार्थिनीही राहत होत्या. दरम्यान, ज्यावेळी आकांक्षाची हत्या झाली तेव्हा तिच्या दोन्ही रूममेट्स गावाला गेल्या असल्याची माहिती पोलिसांनी दिली होती. त्यामुळे हत्या झाली त्यावेळी आकांक्षा खोलीत एकटीच असल्याची शक्यता वर्तवली जात आहे.