नाशिक : नाशिक जिल्ह्यात लम्पीचा प्रादुर्भाव रोखण्यासाठी जिल्हा परिषदेच्या मुख्य कार्यकारी अधिकारी आशिमा मित्तल यांनी जिल्ह्यातील सर्व क्षेत्रीय पशुवैद्यकीय अधिकारी यांची बैठक घेतली. यावेळी अतिरिक्त मुख्य कार्यकारी अधिकारी डॉ अर्जुन गुंडे, जिल्हा पशुसंवर्धन अधिकारी डॉ संजय शिंदे उपस्थित होते.
नाशिक जिल्ह्यात एकुण ८,९५,०५० गोवंशीय पशुधन असून लम्पी रोगाचा प्रादुर्भाव जिल्ह्यामध्ये वाढत आहे. जिल्ह्यात एकुण ४९ ईपी सेंटरमधून २५७ जनावरे बाधित झाली आहे. पशुवैद्यकांमार्फत दैनंदिन उपचाराने ४६ पशुधन बरे झाले असून १३ पशुधनाचा मृत्यू झाली आहे. सध्या उपचारामध्ये १९८ जनावरे आहेत.
आजारी जनावरांची संख्या वाढत असल्याने जिल्हा परिषदेच्या मुख्य कार्यकारी अधिकारी आशिमा मित्तल यांनी दूरदृश्य प्रणालीद्वारे बैठक घेवून सर्व क्षेत्रिय पशुधन विकास अधिकारी/पशुधन पर्यवेक्षक यांना शनिवारपर्यंत १००% लसीकरण करण्यासाठी सूचना दिल्या. तालुका स्तरावर शासकिय अधिकारी कर्मचारी व खाजगी पशुवैद्यकांची मदत घेवून टिम तयार करून लसीकरण मोहिम स्वरूपात राबविण्यासाठी त्यांनी सुचित केले. सर्व पशुवैद्यकिय अधिकारी कर्मचारी यांनी चोवीस तास मुख्यालयी उपस्थित राहून सर्व आजारी पशुधनावर उपचार करण्याबाबत निर्देशित करण्यात आले आहे. जिल्ह्यामध्ये ७१% लसीकरण झालेले असून शनिवार पर्यंत १००% लसीकरण पुर्ण करण्याबाबत अधिकारी कर्मचारी यांना सांगण्यात आले.
पशुपालकांना सूचना
जिल्ह्यातील सर्व ग्रामपंचायतींनी रोगाला अटकाव करण्यासाठी गोठे व परीसर स्वच्छ ठेवावा, आवश्यकतेनुसार गोठयांना जंतुनाशक फवारणी करण्यात यावी यासाठी माझा गोठा स्वच्छ गोठा ही मोहिम सर्व ग्रामसेवक व पशुसंवर्धन अधिकारी कर्मचारी यांनी संयुक्तपणे राबवावी. पशुधन लम्पीच्या विळख्यात सापडल्याचे दिसताच तत्काळ नजीकच्या पशुवैद्यकाशी संपर्क करावा व त्यांच्या मार्गदर्शना नुसार औषधोपचार करावा. आजारी जनावरांना उबदार ठिकाणी, स्वच्छ जागेत बांधावे, जनावरांना स्वच्छ पाणी व मऊ लुसलुसीत खाद्य द्यावे, जनावरांच्या आहारामध्ये क्षार मिश्रणे व जीवनसत्वे ’पुरक खाद्य म्हणून देण्यात यावी.
