करोनाच्या पार्श्वभूमीवर शहरात खासगी वाहनांना प्रवास व वाहतुकीस बंदी करण्यात आली आहे. मात्र, जीवनावश्यक व अत्यावश्यक सेवा यांना शहरात कर्तव्य बजावताना अडचणी येऊ नयेत, यासाठी पोलीस आयुक्तालयात संपर्क कक्ष सुरू करण्यात आला आहे. नाशिककरांना खासगी वाहनाने प्रवास व वाहतूक करताना अडचणी आल्यावर संपर्क कक्षातील अधिकाऱ्यांशी संपर्क करावा, असे आवाहन पोलीस आयुक्त विश्वास नांगरे-पाटील यांनी केले आहे.
- नाशिक शहर पोलीस आयुक्तालय हद्दीत सोमवारपासून कोणत्याही रस्त्यावर सर्व प्रकारच्या वाहनांना प्रवास व वाहतूक करण्यास मनाई करण्यात आली आहे. आदेशानुसार पोलीस, आरोग्य विभाग, अत्यावश्यक सेवा व जीवनावश्यक वस्तू तसेच आपत्ती निवारण व्यवस्थापन यांचेशी निगडित आस्थापनामध्ये कामकाज करणारे अधिकारी व कर्मचाऱ्यांना त्यांच्या कर्तव्यार्थ प्रवास करण्यास परवानगी देण्यात आली आहे. जीवनावश्यक वस्तू व अत्यावश्यक प्रसंगी शहरात खासगी वाहनातून प्रवास करताना अडचणी आल्यास संपर्क कक्षाशी संपर्क साधावा, असे पोलीस आयुक्त नांगरे-पाटील यांनी केले आहे. संपर्क कक्षात नागरिकांच्या अडचणी सोडवण्यासाठी अधिकाऱ्यांची नियुक्ती करण्यात आली आहे.
