विभागीय आयुक्तांनी फटाकेबंदीचे पत्र देत तसा ठराव संमत करण्याचा धरलेला आग्रह आज झालेल्या महासभेने अखेर फेटाळून लावला. त्यामुळे नाशिककरांची दिवाळी धुमधडाक्यात साजरी होणार आहे. याशिवाय, या निर्णयामुळे फटाकेविक्रेत्यांनाही मोठा दिलासा मिळाला आहे.
माझी वसुंधरा अभियानात नाशिकचे नाव कोरण्यासाठी विभागीय आयुक्त राधाकृष्ण गमे यांनी दिवाळीत फटाके बंदीचे पत्र महापालिकेला दिल्याने नाशिककरांची दिवाळी फटाक्यांविनाच जाणार की काय, अशी भीती व्यक्त होत होती. दरम्यान, पालकमंत्री छगन भुजबळ यांच्या मध्यस्थीने विभागीय महसूल आयुक्तांनी काढलेला फटाकेबंदीचा आदेश मागे घेण्याबाबत राज्याचे मुख्य सचिव सीताराम कुंटे यांच्याकडून विभागीय आयुक्त राधाकृष्ण गमे यांना सूचना केली आहे. त्यामुळे फटाकेविक्रेत्यांसाठी स्टॉलची लिलाव प्रक्रिया महापालिकेला पूर्क करता येईल.
