डोक्यावर लाकडाची मोळी घेत राष्ट्रवादी महिला काँग्रेसचे गॅस दरवाढी विरोधात आंदोलन

या बंडखोर आमदारांचा काय झाडी काय डोंगर आणि ५० कोटीचा खर्च समान्यांच्या माथी -प्रेरणा बलकवडे

नाशिक : घरगुती गॅस सिलिंडरच्या किमतीत ५० रुपयांनी वाढ करण्यात आली आहे याच्या निषेधार्थ राष्ट्रवादी महिला काँग्रेसच्या जिल्हाध्यक्ष प्रेरणा बलकवडे व शहराध्यक्ष आनिता भामरे यांच्या नेतृत्वाखाली जिल्हाधीकारी कार्यालयासमोर आंदोलन करण्यात आले.

राष्ट्रवादीच्या महिला जिल्हाध्यक्ष प्रेरणा बलकवडे, शहराध्यक्ष अनिता भामरे, सायरा शेख, पुष्पलता उदावंत, भारती भोई, वर्षा लिंगायत, सरिता पगारे, योगिता आहेर, सुरेखा पठाडे,संगिता पाटील यांच्यासह राष्ट्रवादीच्या महिला पदाधीकाऱ्यांनी डोक्यावर लाकडाची मोळी व गोवऱ्या घेऊन हल्लाबोल करत सरकारचा निषेध केला.

सेनेच्या बंडखोर आमदारांची सुरत व गुवाहाटी वारी जनतेच्या माथी. बंडखोर आमदारांवर केलेला खर्च मोदींनी पद्धतशीर वसूल करण्यास सुरुवात केली असून मोदी सरकार ने पुन्हा गृहीणींच्या माथी लाकडाची मोळी लादली आहे. केंद्र सरकारने Rs 50. ने गॅस दरवाढ केल्याने १४.२ किलोच्या सिलिंडरसाठी नागरिकांना १०५३ रुपये मोजावे लागणार आहेत. घरगुती गॅस सिलिंडरने हजारचा आकडा पार केल्याने गृहिणींचे बजेट कोलमडले आहे. यापूर्वी मे महिन्यातही गॅसच्या दरात मोठी वाढ करण्यात आली होती. सत्तेवर येण्यासाठी भाजप नेत्यांच्या संवेदना मेल्या आहेत. म्हणूनच या संवेदनाहीन क्रूर सरकारचे दरवाढ केलेले सिलेंडर आमच्या घराच्या सुखसमृद्धीत आणि शांतीमध्ये आग लावत आहेत असे सांगत “क्या पेट्रोल, क्या डिझेल, क्या गॅस.. समदं ओके मध्ये” म्हणता म्हणता हे सरकार सबका सत्यानाश करत असल्याचा आरोप प्रेरणा बलकवडे यांनी बोलताना केला.

महिला आंदोलकांनी सरकारचा तीव्र निषेध करत “महागाईवर हल्ला बोल” “केंद्र सरकारवर हल्लाबोल,” “मोदीजी पर हल्लाबोल”, “महंगा सिलेंडर हल्लाबोल”, “बहोत हुई महंगाई की मार !!बस करो मोदी सरकार!!”अशा घोषणा देत परिसर दणाणून सोडला. सर्व सामान्य जनतेला गॅस परवडणार नाही म्हणून आंदोलकांकडून लाकडाच्या मोळी व गोवऱ्या भेट देण्यात आल्या. यावेळी, सुवर्णा गांगोडे, शितल भोर, संगिता राऊत, भारती खिरारी, ज्योती भोर, मंगल माळी, सुरेखा कुऱ्हाडे, रूपाली अहिरे,, निशा झनके, रूपाली तायडे, वैशाली ठाकरे यांच्यासह असंख्य महिला उपस्थित होत्या.