नाशिक : अवघ्या एक दिवसावर मकरसंक्रांत सण आल्याने बाजारपेठेत वाण खरेदीसाठी ग्राहक गर्दी करू लागले आहेत. यंदा बाजारपेठेत नवा ट्रेंड आला असून, चांदीच्या पतंग व चक्रीला ग्राहकांची पसंती मिळत आहे. जावयांसह नातेवाईकांना वाण खरेदीसाठी चांदीच्या वस्तूंना सर्वाधिक पसंती मिळते आहे.
मकरसंक्रांतीपासून रथसप्तमीपर्यंत महिला हळदी-कुंकू समारंभाचे आयोजित करतात. त्यानिमित्त भेटवस्तू दिल्या जातात. शिवाय, सासरची मंडळी जावई व नातेवाईकाला वाण म्हणून भेटवस्तू देतात. काळानुरुप प्रथांमध्ये बदल झाला. ग्राहकांना आकर्षक वाण खरेदी करता यावे, यासाठी सराफ व्यावसायिकांसह दुकानदारांनी विविध आकारातील भेटवस्तू विक्रीस ठेवल्या आहेत.
यात रोप, कुंडी, कापडी बॅगा, पर्स यांसह चांदीच्या छोट्या वस्तूंचा समावेश आहे. यंदा सराफ बाजारात चांदीच्या वस्तू तयार करण्यात आल्या आहेत. त्यात चांदीचा चमचा, वाटी, फुलपात्र, पतंग व चक्रीचा समावेश आहे. चांदीची पतंग व चक्री ग्राहकांचे लक्ष वेधून घेत आहे. काही ग्राहकांच्या मागणीनुसार कारागिरांनी पतंग व चक्री तयार केल्या आहेत. त्यावर कारागिरांनी सुरेक्ष नक्षीकामसुद्धा केले आहे. ते ग्राहकांच्या पसंतीस उतरत आहे.
मकरसंक्रांत सणात हळदी-कुंकवाच्या वाणासाठी चांदीच्या वस्तू जावयांसह नातेवाईकांना भेट दिल्या जातात. चांदीची पतंग व चक्री बाराशे रुपयांपासून ५ हजार रुपयांपर्यंत विक्रीस उपलब्ध आहे. या वस्तूंना ग्राहकांची चांगली पसंती मिळत आहे.
– गिरीश नवसे, अध्यक्ष, नाशिक सराफ असोसिएशन
