मुक्त विद्यापीठाची उन्हाळी सुटी ‘लॉकडाऊन’

नाशिक : ज्ञानगंगा घरोघरी पोहोचवणार्‍या यशवंतराव चव्हाण महाराष्ट्र मुक्त विद्यापीठाने ‘लॉकडाऊन’चा कालावधी हा उन्हाळी सुटी म्हणून जाहीर करण्याचा निर्णय घेतला आहे. येत्या दोन दिवसांत त्याची अधिकृत घोषणा केली जाणार आहे. तत्पूर्वी विद्यापीठात रोजंदारी स्वरुपात काम करणार्‍या कर्मचार्‍यांना 31 मार्च रोजी वेतन मिळाले असून, नियमित कर्मचार्‍यांचे वेतन हे राज्य शासनाच्या नियमांप्रमाणे दिले जाणार आहे. तसेच मे महिन्यात विद्यापीठाच्या परीक्षा होणार आहेत. त्या विषयी अद्याप कोणताही निर्णय घेण्यात आलेला नाही. तोपर्यंत परिस्थिती बघुनच अंतिम निर्णय घेतला जाणार असल्याचे मुक्त विद्यापीठाचे कुलगुरु डॉ.ई वायुनंदन यांनी ‘आपलं महानगर’शी बोलताना स्पष्ट केले.