काही दिवसांपूर्वी नाशिक जेईई मेन परीक्षेचा निकाल जाहीर झाला. त्यानंतर आता नॅशनल टेस्टिंग एजन्सीतर्फे वैद्यकीय अभ्यासक्रमांच्या प्रवेशासाठी अनिवार्य असलेली नॅशनल एलिजिबिलिटी एन्ट्रन्स टेस्ट (NEET) ही प्रवेश परीक्षा होणार आहे. रविवार (७ मे) ही परीक्षा होणार असून शहरातील २० परीक्षा केंद्रांवर ११ हजार विद्यार्थी परीक्षा देणार असल्याची माहिती समोर येत आहे. (NEET exam will be held tomorrow 11 thousand students will give the exam)
नीट परीक्षा मराठी, हिंदी व इंग्रजी यांसह एकूण १३ भाषांमध्ये होणार आहे. नीट परीक्षा ऑफलाइन पद्धतीने होणार असून देशभरातील विविध शहरांतील केंद्रांवर एकाच वेळी ही परीक्षा होणार आहे. या परीक्षेसाठी हजारो विद्यार्थी परीक्षा देणार असल्याने परीक्षेच्या पार्श्वभूमीवर विशेष खबरदारी घेतली जाणार आहेत.
परीक्षा केंद्रात जाण्यापूर्वी मेटल डिटेक्टरद्वारे विद्यार्थ्यांची तपासणी झाल्यानंतर प्रवेश दिला जाणार आहे. तसेच विद्यार्थ्यांना कोणतेही इलेक्ट्रॉनिक साहित्य घेऊन जाण्यास बंदी असेल. सकाळी ११.३० वाजेपर्यंत विद्यार्थ्यांनी परीक्षा केंद्रावर उपस्थित राहावे, अशा सूचना देण्यात आल्या आहेत. शिवाय, परीक्षेला जाताना लांब बाहीचा शर्ट, बुट, कोणतेही दागिने, कानातील, हातातील दागिने, मोबाइल, बॅग, ट्रान्सपरंट नसलेल्या वस्तूंना बंदी आहे.
वैद्यकीय अभ्यासक्रमातील एमबीबीएस, बीडीएस, बीएएमएस, बीएसएमएस, बीयूएमएस आणि बीएचएमएस या अभ्यासक्रमांच्या प्रवेशासाठी संयुक्तरित्या नीट परीक्षा घेतली जाते. नॅशनल टेस्टिंग एजन्सीतर्फे अखिल भारतीय स्तरावरील महत्वाच्या परीक्षांचे आयोजन केले जाते.
नीट परीक्षेचे वेळापत्रकासह अभ्यासक्रम, पात्रता, परीक्षा केंद्र या विषयीची सर्व माहिती https://neet.nta.nic.in या संकेतस्थळावर उपलब्ध करून देण्यात आली आहे. परीक्षेसाठी हॉल तिकीट एनटीएच्या संकेतस्थळावर उपलब्ध करून देण्यात आले आहे.
या नियमांसह परीक्षा १३ भाषांमध्ये होणार
- १८० प्रश्नांसाठी एकूण ७२० गुण वैद्यकीय पदवी अभ्यासक्रमातील प्रथम वर्ष प्रवेशासाठी नीट परीक्षा अनिवार्य आहे.
- नीट परीक्षा लेखी स्वरूपात घेतली जाते.
- दुपारी २ ते ५.२० या वेळेत नीट परीक्षा होईल.
- या परीक्षेत फिजिक्स, केमिस्ट्री, बॉटनी आणि झूलॉजी या चार विषयांवर एकूण १८० प्रश्न विचारले जातील.
- एकूण ७२० गुणांसाठी ही परीक्षा होईल.
- एमसीक्यू पद्धतीने विभाग ए आणि बी अशा दोन सत्रात प्रश्नांची विभागणी असेल.
- प्रत्येक प्रश्नाला चार गुण असतील.
- चुकीच्या उत्तराला १ गुण कमी होईल.
- तीन तास २० मिनिटांचा वेळ असेल.
हेही वाचा – J&K : बारामुल्ला येथील चकमकीत एका दहशतवाद्याचा खात्मा करण्यात सुरक्षा दलाला यश