मुंबई : मुंबई महापालिकेच्या (BMC) रस्ते विभागाच्या माध्यमातून करण्यात येणाऱ्या विविध कामांची माहिती नागरिकांना घरी, कार्यालयात बसल्या जागेवर एका क्लिकवर उपलब्ध होणार आहे. त्यामुळे लोकप्रतिनिधी, नागरिकांना आपल्या विभागात पार पडलेल्या व नियोजित रस्ते कामांची उपयुक्त माहिती मिळणार आहे. तसेच, रस्ते कामांबाबत आपल्या सूचना, तक्रारी पालिका दरबारी माहितीच्या आधारे मांडणे नागरिकांना अधिक सुलभ होणार आहे.
मुंबई महापालिकेच्या रस्ते विभागाच्या माध्यमातून करण्यात येणाऱ्या विविध कामांमध्ये सुसूत्रता राहण्यासाठी, त्यातून अद्ययावत माहिती व सांख्यिकी संकलन आणि विश्लेषण करता यावे, पर्यायाने रस्ते विभागाच्या कामांची अंमलबजावणी, धोरण आखणी, नियोजनातील उपयुक्तता वाढावी म्हणून रस्ते व वाहतूक विभागाकडून माहिती विश्लेषण सेवा घेण्यात येणार आहे. परिणामी, रस्ते विभागाच्या सर्व कामांची माहिती एका क्लिकवर उपलब्ध होणार असून त्याचा महापालिका प्रशासनाला मोठा फायदा होईल.
महापालिकेच्या रस्ते विभागाकडे संपूर्ण मुंबईत रस्ते कामांच्या अंमलबजावणीची जबाबदारी आहे. या प्रकल्पांमध्ये मोठ्या आणि छोट्या रस्त्यांचे सिमेंट काँक्रिटीकरण (सीसी), पदपथांचे सुशोभीकरण आणि ठाशीव काँक्रिटीकरण, रस्ते बांधणी कामांचा प्रामुख्याने समावेश असतो. त्यासोबतच रस्त्यांवरील खड्डे बुजविणे आणि रस्त्यांचे पृष्ठीकरणाच्या देखील करण्यात येते. या सर्वच कामांमध्ये कामे सुरु होण्यापूर्वी, कामे सुरू असताना व दायित्व कालावधीत देखील यंत्रणेला मोठ्या प्रमाणात माहिती (डेटा) संकलन करण्याची गरज भासते. तसेच ही माहिती व सांख्यिकी सातत्याने अद्ययावत करून, विश्लेषण करून त्याआधारे कामांच्या अंमलबजावणीवर देखरेखही करावी लागते. या कार्यवाहीमध्ये सुसूत्रता व वेग आणण्याच्या दृष्टीने, रस्तेविषयक प्रकल्पांची माहिती संकलन आणि विश्लेषण, अहवाल आदी करण्यासाठी रस्ते विभागामार्फत सल्लागार नेमण्याची प्रक्रिया सुरू झाली आहे. माहिती विश्लेषणातून रस्ते व वाहतूक विभागाची धोरणे आणि निर्णय प्रक्रियेसाठी डॅशबोर्ड, सादरीकरण, अहवाल इत्यादी तयार करणे या बाबी देखील यामधून साध्य करण्यात येणार असल्याचे महापालिका अतिरिक्त आयुक्त (प्रकल्प) पी. वेलरासू यांनी सांगितले.
महापालिकेकडून सुरू असलेल्या रस्ते प्रकल्पांशी संबंधित माहिती उपलब्ध करून देण्याची जबाबदारी सल्लागाराकडे सोपवली जाणार आहे. सल्लागाराच्या चमूमध्ये तांत्रिक मनुष्यबळाचा देखील समावेश राहणार आहे. आगामी एक वर्ष कालावधीसाठी सल्लागार नेमण्याच्या या प्रक्रियेला सुरुवात झाली आहे.
प्रकल्पांच्या माहितीसाठी डॅशबोर्ड
मुंबई महापालिकेकडून रस्ते विभागाशी संबंधित प्रकल्पांबाबतची माहिती एकत्रित संकलित करणे तसेच ही माहिती एकत्रपणे उपलब्ध होणे, हे डॅशबोर्ड निर्मितीचे उदिष्ट आहे. मुंबईतील रस्त्यांच्या प्रकल्पांची माहिती तसेच रस्त्यांचे खड्डे दुरुस्ती आणि पृष्ठीकरणाची कामे याबाबतची माहिती डॅशबोर्डच्या माध्यमातून वेळोवेळी यंत्रणेला उपलब्ध होणार आहे. प्रकल्पाबाबतची माहिती तसेच अद्ययावत तंत्रज्ञान यंत्रणेला वेळोवेळी अवगत करून देणे देखील अपेक्षित आहे.
सध्या पर्जन्य जलवाहिन्या विभागाकडून मुंबईतील नाल्यातून गाळ काढण्याच्या कामाचा डॅशबोर्ड उपलब्ध करून देण्यात आला आहे. त्यामुळे प्रशासनासह सर्वसामान्य नागरिकांना देखील नाल्यांमधून गाळ काढण्याच्या कामांची अद्ययावत माहिती ऑनलाईन पाहता येते. हा अनुभव लक्षात घेता आता रस्ते प्रकल्पांशी संबंधित माहिती विश्लेषण निश्चितच प्रशासनाला सहायकारी ठरेल, असा विश्वास पालिकेकडून व्यक्त करण्यात येत आहे.
सल्लागाराच्या जबाबदाऱ्या
- रस्ते आणि वाहतूक विभागाच्या महत्वाच्या प्रकल्पांचे संनिरीक्षण करणे.
- प्रकल्पांशी संबंधित विविध घटकांसोबत समन्वय ठेवून नियमित माहिती मिळवणे, प्रकल्पातील अडथळे, अडचणी विभागाच्या लक्षात आणून देणे
- प्रत्येक प्रकल्पामधील अडथळे आणि आव्हाने अभ्यासून संबंधित यंत्रणेला उपाययोजनांसाठी सल्ला देणे
- प्रशासकीय प्रमुखांना आढावा घेता येईल अशारितीने प्रकल्पाची एकत्रित व अद्ययावत माहिती तयार ठेवणे
- प्रकल्पांमधील कामगिरी, महत्त्वाचे मुद्दे यांच्यासह सादरीकरण व अहवाल तयार करणे
- प्रकल्पाच्या नियोजनाचा आराखडा तपासणे आणि वेळेत पूर्ततेसाठी काटेकोरपणे देखरेख ठेवणे
- प्रशासनाला अद्ययावत तंत्रज्ञानाची सातत्याने माहिती पुरवणे, जेणेकरुन प्रकल्पांच्या अंमलबजावणीमध्ये गुणवत्तापूर्ण वाढ व वेग साध्य करता येईल.
