नाशिकरोड पोलीस ठाण्यातील कर्मचा-याला एका चौकशी प्रकरणात आर्थिक मध्यस्थी केल्याच्या कारणावरुन पोलीस आयुक्त विश्वास नांगरे-पाटील यांनी निलंबित केल्याचे समजते. उच्चपदस्थ अधिका-यांनीही या वृत्तास दुजोरा दिला आहे.
याबाबत समजलेली माहिती अशी, नाशिकरोडच्या एका पोलीस अधिका-याची खातेअंतर्गत चौकशी सुरु आहे. आयुक्तालयातील चौकशी अधिकारी (डी.ई.) व नाशिकरोड पोलीस ठाण्यात कार्यरत एक पोलीस कर्मचारी यांनी या प्रकरणात आर्थिक देवाण-घेवाण केल्याच्या तक्रारी पोलीस आयुक्त विश्वास नांगरे-पाटील यांच्याकडे प्राप्त झाल्या होत्या. त्या प्रकरणात संबंधित कर्मचारी प्रथमदर्शनी दोषी आढळून आल्यानंतर पोलीस आयुक्तांनी त्याला निलंबित केले. आयुक्तालयातील इतर अधिकारी व कर्मचारी यांचीही चौकशी सुरु असून दोषींवर कडक कारवाई होणार असल्याचे समजते.
गेल्या महिन्यात नाशिकरोड पोलीस ठाणे हद्दीतील गोरख खर्जुल प्रकरणात एक अधिकारी व पाच कर्मचा-यांचे निलंबन झाले होते. त्यापूर्वी देवळाली कॅम्प येथील पाच कर्मचारीही कामात कसूर केल्याच्या कारणावरुन निलंबित झाले होते. त्याचबरोबर गेल्या काही दिवसांपूर्वी उपनगर पोलीस ठाण्याच्या हद्दीतील देवळाली गाव चौकीतील एक अधिकारी व कर्मचा-यांची बदली करण्यात आल्याची घटना ताजी असतानाच आर्थिक देवाण-घेवाणीवरुन झालेल्या निलंबनावरुन पोलीस दलात खळबळ उडाली आहे.
