पुणे : गेल्या अनेक दिवसांपासून पुणेकरांच्या चर्चेचा विषय असलेल्या चांदणी चौक पुलाचा उद्घाटन सोहळा आज पार पडला. या पुलाचे उद्घाटन केंद्रीय रस्ते आणि वाहतूक मंत्री नितीन गडकरी यांच्या हस्ते करण्यात आले आहे. या कार्यक्रमाला राज्याचे उपमुख्यमंत्री देवेंद्र फडणवीस आणि अजित पवार उपस्थित होते. तर मुख्यमंत्री एकनाथ शिंदे यांची तब्येत बरी नसल्याकारणाने ते कार्यक्रमाला गैरहजर आहे. जेव्हापासून अजित पवार यांनी सरकारमध्ये सहभागी होत उपमुख्यमंत्रीपदाची शपथ घेतली आहे. तेव्हापासून विरोधकांकडून त्यांना डिवचण्याचे काम सुरू आहे. विरोधी पक्षनेते विजय वडेट्टीवार आणि काँग्रेसचे प्रदेशाध्यक्ष नाना पटोले यांनी मुख्यमंत्रीपदाच्या खुर्चीवरून राज्यातील त्रिशुळ सरकारला टोले लगावले आहेत. त्यांच्या या टोल्यांना उपमुख्यमंत्री अजित पवार यांनी उद्घाटन कार्यक्रमातून उत्तर दिले आहे. (Criticism of Ajit Pawar’s opponents )
हेही वाचा – अजितदादांसारखा नेता आमच्यासोबत असल्याने पुण्याच्या विकासाला गती मिळेल – देवेंद्र फडणवीस
यावेळी बोलताना उपमुख्यमंत्री अजित पवार म्हणाले की, आता कुठे विरोधी पक्ष झाले आणि त्याना कुठे कोल्ड वॉर दिसलं कुणाला माहिती. एकाला वाटते की या दोन उपमुख्यमंत्र्यांचा मुख्यमंत्रीपदाच्या एका खुर्चीवर डोळा आहे. अरे आम्ही काय बेअक्कल आहोत काय? खुर्ची एक असेल तर दोघांचा डोळा ठेवून कसे चालेल? आणि ती खुर्ची भरलेली आहे ना? व्यक्ती बसलेली आहे. मला हे खरंतर काढायचे नव्हते. पण काय होते, आम्ही बोललो नाही तर एकच बाजू लोकांना दिसते, दुसरी बाजू दिसत नाही, असा टोला त्यांनी विरोधी पक्षनेते विजय वडेट्टीवार आणि नाना पटोले यांना लगावला.
तर, अलिकडे रुसून गेले, फुगून गेले, तसंच झालं, आता ते काम करत आहेत, राज्याचे प्रमुख म्हणून एकनाथ शिंदे यांचे चांगले काम सुरू आहे. त्यांच्या जोडीला देवेंद्र फडणवीस होते एका बाजूला, दुसरी बाजू मोकळी होती. मी आता तिथे जाऊन उभा राहिलो. आम्ही दोघंही त्यांच्याबरोबर आहोत. त्यात चुकले काय? राज्याचा सर्वांगिण विकास होत असेल, केंद्रातून नितीन गडकरी आणि पंतप्रधान नरेंद्र मोदी पैसे देत असतील तर का पैसे घ्यायचे नाहीत? का राज्याचा विकास करायचा नाही? असा प्रश्न यावेळी अजित पवारांनी उपस्थित केला.
यावेळी त्यांनी प्रसार माध्यमांना देखील सुनावले आहे. दोन दिवसाच्या बातम्या बघा. अजित पवारांनी बैठक घेतली. अरे तुझ्या का पोटात दुखत आहे? बैठक घेतली तर काय? सह्याद्री अतिथीगृहावर देवेंद्र फडणवीस हे देखील होते. ते इंडस्ट्रीच्या मीटिंग घेत होते. मी रिसोर्सेस वाढवण्याची मीटिंग घेत होतो. उद्या आपल्याला पैसा द्यायचा असेल तर टॅक्स व्यवस्थित आला पाहिजे, तिथल्या लिकेजेस थांबल्या पाहिजेत, असे अजित पवार यांच्याकडून सांगण्यात आले.
