मुंबई : भाजपाचे ज्येष्ठ नेते, राज्याचे माजी मंत्री आणि विधानसभेतील विरोधी पक्षनेते मधुकर पिचड यांचे शुक्रवारी संध्याकाळी साडे सहाच्या सुमारास प्रदीर्घ आजाराने निधन झाले. ते 84 वर्षांचे होते. काही दिवसांपूर्वी त्यांना पक्षाघाताचा झटका आला होता. गेल्या दीड महिन्यांपासून त्यांच्यावर नाशिकमधील रुग्णालयात उपचार सुरू होते.
ज्येष्ठ नेते मधुकर पिचड यांना 15 ऑक्टोबर रोजी पहाटे ब्रेनस्ट्रोकचा झटका आला होता. त्यानंतर त्यांना नाशिकमधील रूग्णालयात दाखल करण्यात आले होते. दीड महिन्यांपासून तेथेच त्यांच्यावर उपचार सुरू असताना आज त्यांची प्रकृती अधिकच खालावली. आणि उपचारादरम्यान त्यांची प्राणज्योत मालवली. दरम्यान मधुकर पिचड यांच्या निधनाने त्यांचे चिरंजीव वैभव पिचड यांच्यासह कुटुंबीयांवर दु:खाचा डोंगर कोसळला आहे.
मधुकर पिचड यांचे शुक्रवारी संध्याकाळी 6.30 वाजता निधन झाले. त्यांच्या अंत्यविधीचा कार्यक्रम त्यांच्या मूळ गावी राजोर येथे उद्या, शनिवारी संध्याकाळी 4 वाजता होणार आहे. त्यांचे पार्थिव शनिवारी सकाळी 10 वाजता देवठाण या गावी जाईल. त्यानंतर 10.30 वाजता पक्ष कार्यालयत ठेवण्यात येईल. दुपारी 1 वाजताच्या सुमारास अकोला कॉलेजमध्ये त्यांचे पार्थिव दर्शनासाठी ठेवण्यात येईल. त्यानंतर राजौरी येथील मधुकर विद्यालयात पिचड यांचे पार्थिव अंत्यदर्शनासाठी ठेवण्यात येईल. त्यानंतर पुढील विधींसाठी राजौरी येथील त्यांच्या निवासस्थानी पार्थिव नेण्यात येणार असल्याची माहिती पिचड यांचे चिरंजीव वैभव पिचड यांनी दिली आहे.
महाराष्ट्राच्या राजकारणामध्ये मधुकर पिचड यांचं नाव आदराने घेतलं जातं. त्यांची राजकीय कारकीर्द कॉंग्रेस पक्षातून सुरू झाली. महाविद्यालयात असतांनाच आदिवासी शेतकऱ्यांच्या शोषणाविरुद्ध आंदोलनात सक्रीय सहभागी झाले होते. 1961 मध्ये त्यांनी हा लढा दिला होता. त्यानंतर पिचड यांनी राष्ट्रवादीत प्रवेश केला. तेथे त्यांनी प्रदेशाध्यक्षपद भूषवले. त्यांनी आदिवासी विकास, वन आणि पर्यावरण मंत्री म्हणून कार्यभार पाहिला होता. 2019 च्या विधानसभा निवडणुकीत पिचड यांनी राष्ट्रवादीची साथ सोडून भाजपमध्ये प्रवेश केला होता. देवेंद्र फडणवीस यांच्या उपस्थितीत पिचड यांनी आपल्या मुलासह प्रवेश केला. पण, 2019 च्या निवडणुकीत वैभव पिचड यांचा पराभव झाला.
पिचड यांनी अलीकडेच शरद पवार यांची भेट घेतली होती. त्यामुळे घरवापसीची चर्चा रंगली होती. पण, मधुकर पिचड यांची प्रकृती खालावली. ब्रेनस्ट्रोक आल्याने त्यांना नाशिक येथील नाईन पल्स रूग्णालयात दाखल केलं होतं. त्यांच्यावर दीड महिन्यांपासून उपचार सुरू होते. आज दुपारी पिचड यांची प्रकृती खालावली. संध्याकाळी त्यांनी रुग्णालयामध्ये अखेरचा श्वास घेतला. पिचड यांच्या निधनामुळे कुटुंबावर दु:खाचा डोंगर कोसळला आहे.
मधुकर पिचड यांचा राजकीय प्रवास
अकोले पंचायत समितीवर सदस्य म्हणून 1972 ला निवड
1972 ते 1980 पंचायत समितीवर सभापती म्हणून निवड
1980 पासून 2009 पर्यंत सलग 7 वेळा आमदार म्हणून विधानसभेवर
1995 ते जुलै 1999 या काळात विधानसभेच्या विरोधी पक्षनेते पदाची धुरा सांभाळली होती.
2014 मध्ये अकोले मतदार संघातून पुत्र वैभव पिचड यांना राष्ट्रवादीकडून निवडून आणले
2019 मध्ये पिचड यांनी आपल्या मुलासह भाजपात प्रवेश केला. त्यावेळी वैभव पिचड यांचा भाजपच्या तिकीटावर पराभव झाला.
मधुकर पिचड यांनी 1961 मध्ये अमृत सागर दूध सहकारी संस्थेची तर 1993 मध्ये अगस्ती सहकारी साखर कारखान्याची स्थापन केली.
Edited by : Ashwini A. Bhatavdekar
