नाशिक : शरद पवार यांच्या वक्तव्याचे स्वागत करतो, आमचीही तीच भूमिका असून अजित पवार आमचे नेते आहेत. दादा जसे नेते तसे आम्ही भुजबळ, मुंडे सुद्धा कार्यकर्ते आहोत. आम्हीही तेच म्हणत आहोत, म्हणून आम्ही भेटलो. त्यामुळे राष्ट्रवादीत फूट नाही, फक्त एक गट सरकारमध्ये सामील झाला असून आम्ही पक्ष सोडलेला नाही, आमची निशाणी घड्याळच आहे, आमचा झेंडा तोच आहे, असे स्पष्टीकरण मंत्री छगन भुजबळ यांनी दिले आहे.
राष्ट्रवादीचे नेते शरद पवार यांनी केलेल्या वक्तव्यानंतर राजकीय चर्चाना उधाण आले असून महाराष्ट्राच्या राजकारणात नेमके चालले आहे असा प्रश्न उपस्थित झाला आहे. याच पार्श्वभूमीवर अनेक नेत्यांच्या प्रतिक्रिया येत असून मंत्री छगन भुजबळ यांनी देखील आपले मत व्यक्त केले आहे. भुजबळ म्हणाले की, ’शरद पवार यांच्या वक्तव्याचे स्वागत करतो, आमचीही तीच भूमिका असून अजित पवार आमचे नेते आहेत. दादा जसे नेते तसे आम्ही भुजबळ, मुंडे सुद्धा कार्यकर्ते आहोत. आम्हीही तेच म्हणत आहोत, म्हणून आम्ही भेटलो. त्यामुळे राष्ट्रवादीत फूट नाही, फक्त एक गट सरकारमध्ये सामील झाला असून तुम्ही ही समर्थन द्यावे, एवढंच आमचे म्हणणे आहे.
वक्तव्याचा विपर्यास
संभाजी भिडे हे मनोहर कुलकर्णी आहे की नाही? मी म्हणालो. शक्यतो संभाजी, शिवाजी अशी नावे नसतात. मग ते म्हणाले, नाव आहे. पण वाद तो नाहीच, संभाजी भिडे हा मुद्दा आहे. पण ते वेगळ्या पद्धतीने पसरवण्यात आले. हे आंदोलन, ते आंदोलन. मते बनवण्यासाठी या समाज माध्यमांचा उपयोग होत आहे. मात्र याच माध्यमातून वक्तव्याचा विपर्यास केला जातो. काही मंडळी पराचा कावळा करतात. राजकारणात विकास हा महत्त्वाचा असतोच, पण भावना आणि तत्व देखील महत्त्वाचे असतात. अनेक लोकं ही भावनेने जोडली जातात. त्यासाठी मताचा विरोध मताने करायला हवा.
भाजपकडून समाजमाध्यमांचा मोठा उपयोग
2014 मध्ये भाजपने समाज माध्यमांचा मोठा उपयोग करून घेतला. तसा विचार देखील कुणी केला नव्हता. मी जर ऑनलाईन भाषण केले तर लाखो लोकांशी बोलू शकतो. मागच्या आठवड्यात मी माझे म्हणणे मांडले. त्याच्यावरून आता सुरुवात झाली.
