नांदेड : आईचे निधन झाल्यानंतर अंत्यदर्शनासाठी माहेरी आलेल्या मुलीने पार्थिवाजवळच प्राण सोडल्याने मनाला चटका लावणारी घटना नांदेड जिल्ह्यात घडली आहे. या घटनेने सर्वत्र हळहळ व्यक्त होत आहे.
नांदेड जिल्ह्यातील हदगाव तालुक्यातील गयाबाई शेवाळ यांचे निधन झाले. त्यांची मुलगी जयमाला जाधव हीला आईच्या निधनाची बातमी समजताच ती तिच्या माहेरी निघून आली. आईचे पार्थिव पाहताच जयमाला यांनी हंबरडा फोडत रडायला सुरूवात केली. आई गेल्याचे दु:ख त्यांना सहन न झाल्याने त्यांना चक्कर आली. त्यामुळे त्यांना नांदेडमधील रुग्णालयात दाखल करण्यात आले. मात्र, उपचारापूर्वीच जयमाला यांनी प्राण सोडले होते.
हेही वाचा – ‘संभाजीनगरमधील दंगलीसाठी समाजसंकटांना खुली सुट; राममंदिर आणि दंगल रोखण्यासाठी फक्त १५ पोलीस’
गयाबाई किशनराव शेवाळकर यांचा शुक्रवारी (31 मार्च) वृद्धापकाळाने हदगाव तालुक्यातील तामसा येथे निधन झाले होते. जयमाला जाधव (56) आईच्या निधनानंतर त्यांच्या माहेरी आल्या होत्या. पण त्यांनी पार्थिवावर प्राण सोडल्याने शेवाळकर आणि जाधव कुटुंबियांवर दु:खाचा डोंगर कोसळला आहे. धक्कादायक म्हणजे जयमाला जाधव यांच्या पतीचे आठ महिन्यांपूर्वीच निधन झाले होते आणि सासू सासऱ्यांचेही निधन झाल्यामुळे त्या एकटेपणाने खचल्या होत्या. त्यात आता आईचाही मृत्यू त्यांना सहन झाला नाही. हदगांव तालुक्यातील या घटनेने तामसा गावावर शोककळा पसरली.
भावाच्या निधनानंतर बहिणीने सोडले प्राण
परभणीतील पूर्णा या गावात गेल्या वर्षी सुनील नारायण जैस्वाल यांचे निधन झाले होते. भावाच्या निधनाची बातमी समजताच मोठी बहीण सुनीता विजय जैस्वाल (६५ ) या छत्रपती संभाजीनगर येथून अंत्यविधीसाठी आल्या. सकाळी अकरा वाजता सुनील यांच्या अंत्यविधीची तयारी सुरु असतांना त्यांना दु:ख अनावर होऊन हृदय विकाराचा झटका आला आणि त्यात त्यांचा मृत्यू झाला. सुनील जैस्वाल यांच्यावर सकाळी साडेअकरा वाजता, तर सुनीता यांच्या पार्थिवावर सायंकाळी अंत्यसंस्कार करण्यात आले.
हेही वाचा – काळजी घ्या : जम्बो कोविड सेंटर पुन्हा सुरू होणार; ‘या’ देशातून येणाऱ्या प्रवाशांची होणार चाचणी
