कोरोना व्हायरसचा विळखा देशात सर्वाधिक महाराष्ट्र राज्याला बसला आहे. ग्रामीण महाराष्ट्रात सर्वाधिक रुग्ण सांगली जिल्ह्यातील इस्लामपूर येथे आढळून आले आहेत. या निमित्ताने सांगलीतील शिवप्रतिष्ठान हिंदुस्थान या संघटनेचे प्रमुख संभाजी भिडे यांनी काही उपाययोजना सांगितल्या आहेत. कोरोनाग्रस्तांना बरे करायचे असेल तर गोमूत्र, गाईचे तूप आणि बिब्बा हे तीव्र जंतुनाशक पदार्थ वापरावते, असा सल्ला त्यांनी त्यामुळे केंद्र आणि राज्य सरकाला दिला आहे. कोरोनावर लस शोधण्यासाठी जागतिक आरोग्य संघटनेसहीत जगभरातील अनेक देशातील शास्त्रज्ञ अहोरात्र मेहनत घेत असताना भिडे गुरुजींनी सुचवलेला उपायावर आता उलटसुलट चर्चा सुरु झाली नाही तर नवल.
सांगलीचे जिल्हाधिकारी यांना निवेदन दिल्यानंतर पत्रकारांशी बोलताना संभाजी भिडे यांनी कोरोनाच्या विषाणूला मारण्यासाठी ही कल्पना सांगितली. “मी आयुर्वेदात वाचले आहे की, कोणत्याही प्रकारचे जंतू जे श्वासावाटे शरीरात जातात, त्याचा नाश करण्याची ताकद गोमूत्र आणि गाईच्या तुपात आहे. आता जे काही कोरोनाचे रुग्ण आहेत. त्यांच्या नाकात दर तीन तासांनी तुपाचे बोट फिरवावे. सकाळ-संध्याकाळ त्यांना गोमूत्र प्यायला दिले तर त्यांच्या शरिरातील कोरोना विषाणू कायमचा नष्ट होईल.”, अशी कल्पना भिडे गुरुजी यांनी सांगितली आहे.
सांगलीतील त्या लोकांवर ३०७ कलम दाखल करा
इस्लामपूर मधील एकाच कुटुंबातील वीसहून अधिक लोकांना कोरोनाची लागण झाली आहे. त्या कुटुंबातील ज्यांनी ही साथ पसरवली त्यांच्यावर ३०७ चा गुन्हा दाखल करावा, अशी मागणी भिडे यांनी केली आहे. ही गोष्ट राजकारण बाजुला ठेवून देशाची सुरक्षितता आणि लोकांच्या आरोग्यासाठी करने आवश्यक असल्याचेही ते म्हणाले.
तसेच जे जे लोक शासनाच्या सुचनांचे पालन करायला तयार आहेत. त्यांना सेवेचे संधी द्यावी. जे रोगी मृत होत आहेत, त्या वयस्कर आहेत. तरुणांना याचा परिणाम जाणवत नाही. अशक्त – कमजोरांना कोरोना बाधत असल्यामुळे इतर तरुणांना आणि लहानग्यांना मोकळ्या वातावरणार खेळण्याची परवानगी द्यावी. आता जे नियम केले आहेत. त्यात थोडीशी शिथिलता आणावी, अशीही मागणी भिडे यांनी केली आहे.
