टीकटॉक स्टार पूजा राठोड आत्महत्याप्रकरणामुळे अडचणीत आलेले वनमंत्री संजय राठोड यांनी राजीनामा दिला. यामुळे हे प्रकरण तात्पुरते निवळले असल्याचे चित्र निर्माण झालेले असतानाच भाजपच्या नेत्या पंकजा मुंडे यांनी याप्रकऱणावर टि्वट करत सामाजिक न्यायमंत्री धनंजय मुंडे यांनाही लक्ष्य केले आहे.
एका मंत्र्याच्या राजीनाम्याची एक निर्णयाची पायरी उशिराने का होईना ओलांडली आता निष्पक्षपातीपणे चौकशी चा डोंगर सरकारला ओलांडायचा आहे.. सरकारच्या इतिहासात महिलांच्या बद्दल एवढा दुजाभाव आणि सामाजिक व्यवस्थेची इतकी दुरवस्था आपल्या महाराष्ट्राला शोभणारी नाही. https://t.co/qPn33FbOAx
— Pankaja Gopinath Munde (@Pankajamunde) February 28, 2021
या टि्वटमध्ये पंकजा यांनी निष्पक्षपातीपणाचा डोंगर सरकारला अजून ओलांडायचा असल्याचा इशारा दिला आहे. त्याचबरोबर महिलांबद्दल एवढा दुजाभाव महाराष्ट्राला शोभणारा नाही असेही म्हटले आहे. पंकजा मुंडे यांच्या या टि्वटचा रोख धनंजय मुंडेकडे असल्याच्या चर्चा आहेत.
संजय राठोड प्रकरणावर भाजपाचे प्रदेशाध्यक्ष चंद्रकांत पाटील यांनी नुकतेच एक वक्तव्य केले होते. ‘संजय राठोड प्रकरणी जे उद्धव ठाकरे यांनी केले ते शरद पवार यांनी करायला हवं होतं. धनंजय मुंडे यांचा राजीनामा घ्यायला हवा होता’. असे पाटील यांनी म्हंटले होते. त्याचाच हवाला देत पंकजा यांनी हे टि्वट केले आहे.