गणेशोत्सव आणि नवरात्रोत्सवासाठी मूर्ती तयार करुन विक्री करणाऱ्या मूर्तिकारांनाच तात्पुरत्या स्वरुपाचे मंडप बांधण्यासाठी व त्यामध्ये मूर्तींची विक्री करण्यासाठी मुंबई महापालिकेच्या विभाग कार्यालयातून यंदाही ‘ऑफलाईन’ पद्धतीने परवानगी देण्यात येणार आहे. मात्र, मुंबईबाहेरुन तयार मूर्ती आणून फक्त त्यांच्या विक्रीसाठी मंडप बांधण्याची परवानगी देण्यात येणार नाही, असा इशारा मुंबई महापालिकेने दिला आहे. महापालिकेने मूर्तिकारांना मंडपाकरीता परवानगी देण्यासाठी सन २०२१ करीता लागू केलेले विविध स्तरीय शुल्काबाबतचे परिपत्रक पालिकेच्या २४ विभाग कार्यालयांमध्ये उपलब्ध करण्यात आले आहे.
तसेच सदर परिपत्रक हे मुंबई महापालिकेच्या संकेतस्थळावर देखील उपलब्ध करण्यात आले आहे. त्यासाठी //portal.mcgm.gov.in/irj/portal/anonymous/qlCircuis ही लिंक उपलब्ध करून देण्यात आली आहे. सर्व संबंधितांनी महापालिकेद्वारे देण्यात आलेल्या व वेळोवेळी देण्यात येणाऱ्या सूचनांचे पालन करुन महापालिका प्रशासनास सहकार्य करावे, असे आवाहनही करण्यात आले आहे.