मुंबईत पिण्याव्यतिरिक्त कामांसाठी, नवीन इमारत बांधकामाकरिता पाण्याचा वापर करण्यासाठी ‘बोअरवेल’ खोदण्यास ऑनलाईन परवानगी देण्याची प्रक्रिया मुंबई महापालिका प्रशासनाने सुरू केली आहे. त्यामुळे सर्वसामान्य नागरिकांना आणि इमारत बांधकाम करणाऱ्या बिल्डरांना मोठा दिलासा मिळाला आहे. मुंबईत पालिका जल अभियंता खात्यामार्फत पिण्याच्या पाण्याचा पुरवठा करण्यात येतो. मात्र, याच पिण्याच्या पाण्याचा वापर शौचालय, मुतारी, गाड्या, कपडे, लोखंडी खिडक्या, ग्रील, धुणे, उद्यान कामे, भांडी घासणे आदी कामांसाठी केला जातो. त्यामुळे पिण्याच्या पाण्याचा गैरवापर होत आहे. मात्र, जर या पिण्याव्यतिरिक्त कामांसाठी ‘बोअरवेल’ खोदून त्यातील पाण्याचा वापर केल्यास पिण्याच्या पाण्याचा वापर कमी होऊन शुद्ध पाण्याची मोठ्या प्रमाणात बचत होण्यास मदत होणार आहे.
‘बोअरवेल’ खोदण्यासाठी संबंधित विविध खात्यांच्या परवानग्या मिळवण्यात व जाचक अटीशर्ती आदींमुळे बराच उशीर होतो. त्यामुळे बोअरवेल खोदून त्यातील पाण्याचा चांगल्या उद्देशाने वापर करण्याबाबतचा हेतू साध्य होत नाही. यास्तव, पालिकेने ‘बोअरवेल’ खोदण्यासाठी आवश्यक असलेली जाचक प्रक्रिया अधिकाधिक सुलभ करून जल अभियंता खात्याने तात्काळ परवानगी द्यावी, अशी मागणी भाजपचे नगरसेवक हरीश छेडा यांनी ठरावाच्या सुचनेद्वारे केली होती.