कल्याण डोंबिवली शहरात भटक्या कुत्र्यांचा त्रास दिवसेंदिवस वाढत चालला आहे. गेल्या सहा वर्षात तब्बल ६३ हजार २६२ जणांना भटक्या कुत्र्यांनी चावा घेतल्याची अधिकृत आकडेवारी पालिकेने जाहीर केली आहे. अॅन्टी रेबीज इंजेक्शनवर पालिकेकडून २ कोटी ७३ लाख खर्च करण्यात आले आहे. मात्र केडीएमसीत पशुवैद्यकीय अधिकारी नसल्याची धक्कादायक बाब उजेडात आली आहे. पालिकेचे वैद्यकीय आरोग्य अधिकारी राजू लवंगारे यांनी ही माहिती स्थायी समितीत दिली.
कुत्र्यांची आकडेवारी पालिकेकडे नाही
शहरात दररोज ३० ते ४० जणांना श्वानांच्या दंशाला सामोरे जावे लागतय. मात्र पालिकेत पशुवैद्यकीय अधिकारी नसल्याने पालिकेच्या रुग्णालयातच रुग्णावर उपचार केले जातात. दर तीन वर्षांनी पशुगणना होणे गरजेचे आहे. मात्र पालिका क्षेत्रात २०१५ नंतर पशुगणना झालेली नाही. त्यामुळे शहरात भटक्या व पाळीव कुत्र्यांची नेमकी आकडेवारी पालिकेकडे नाही. श्वानांच्या निर्बीजीकरणाचा प्रस्ताव शुक्रवारच्या स्थायी समितीच्या बैठकीत मंजुसाठी ठेवण्यात आला होता. ‘मे व्हेटस सोसायटी फॉर अॅनिमल वेल्फेअर अॅन्ड रूरल डेव्हलपमेंट हैद्राबाद’ या संस्थेला मंजुर करण्यात आला. प्रति श्वान ८४० रूपयाचा दर मंजुर करण्यात आला आहे. त्यावेळी झालेल्या चर्चेत नगरसेवकांनी भटक्या कुत्रांच्या समस्येकडे प्रशासनाचे लक्ष वेधले. भटक्या कुत्र्यांबरोबरच घरात कुत्रे पाळणाऱ्यांवर कोणतेच नियंत्रण नसल्याची बाब ही नगरसेवकांनी मांडली. विविध जातीच्या पाळीव कुत्रांवरही अनेकजण व्यवसाय करीत असल्याची बाब ज्येष्ठ नगरसेवक वामन म्हात्रे यांनी मांडली.
पाळीव प्राण्यांची नोंदणी करा
शहरातील प्रत्येक पाळीव प्राण्यांची नोंदणी होणे गरजेचे आहे. डोमेस्टिक अॅनिमल अॅक्टनुसार पाळीव प्राण्यांसदर्भात कोणते कायदे आहेत याचा पालिकेने अभ्यास करून प्रत्येक पाळीव प्राण्यांची नोंदणी करावी तसेच पशुवैद्यकीय अधिकाऱ्यांची तातडीने नेमणूक करावी असे निर्देश स्थायी समिती सभापती दिपेश म्हात्रे यांनी दिले आहेत.
श्वान दंशाची संख्या आणि अॅन्टी रेबीज इंजेक्शन
वर्ष रूग्णांची संख्या अॅन्टी रेबीज इंजेक्शन
एप्रिल १२ ते मार्च १३ ८३२९ ४००००
एप्रिल १३ ते मार्च १४ ७८४७ २८०००
एप्रिल १४ ते मार्च १५ १०११५ ३००००
एप्रिल १५ ते मार्च १६ १०८२३ ३००००
एप्रिल १६ ते मार्च १७ १२६५६ ५३०००
एप्रिल १७ ते मार्च १८ १३४९२ ३१०००
इतर दंशाच्या रूग्णांचे प्रमाण तक्ता
रूग्ण २०१४ – १५ २०१५ -१६ २०१६- १७ २०१७- १८
श्वान दंश १०११५ १०८२३ १२६५६ १३४९२
विंचू दंश ४८ ८४ ७३ ९४
सर्प दंश १४९ १७३ १५६ १८३
हेही वाचा- केडीएमसीचे शिलकी अंदाजपत्रक अखेर मंजूर
हेही वाचा- केडीएमसीचे आज बजेट
