Mhada Lottery 2023 : मुंबई : ‘म्हाडा’ (Mhada) लॉटरी म्हटली की प्रत्येकजण अर्ज करण्याचा प्रयत्न करतो. यासाठी काही दिवस आधीपासूनच कागदपत्रांची जुळवाजुळव पूर्ण करण्याचा आपण करतो. म्हाडाकडून येत्या 26 जूनपर्यंत अनामत रक्कमेसह अर्ज भरण्याची शेवटची तारीख होती. परंतु अर्ज करण्याची शेवटची तारीख जवळ आली तरी काही जणांकडे अजूनपर्यंत कागदपत्रांची जुळवाजुळव झाली नसेल अशा लोकांसाठी दिलासा देणारी बातमी आहे. म्हाडाने अर्ज भरण्यासाठी मुदतवाढ देण्याचा निर्णय घेण्यात आला असून म्हाडा उपाध्यक्षांनी मंजूरी दिल्यास अधिकृत घोषणा करण्यात येणार आहे. (Mhada Lottery 2023 Deadline to apply to ‘MHADA’ Mumbai Board? Motion to the Vice President)
म्हाडाच्या मुंबई मंडळातील 4 हजार 82 घरांच्या सोडतीसाठीच्या अर्जविक्री-स्वीकृती प्रक्रियेला आता 10 जुलैपर्यंत मुदतवाढ देण्याचा निर्णय घेण्यात आला आहे. त्यासंदर्भात प्रस्ताव म्हाडा उपाध्यक्षांकडे पाठविण्यात आला असून प्रस्तावाला मंजुरी मिळाल्यावर याबाबतची अधिकृत घोषणा करण्यात येणार आहे. त्यामुळे 26 जूनपर्यंत अनामत रक्कमेसह अर्ज भरण्याची मुदत 8 जुलैपर्यंत वाढण्याची शक्यता आहे. आरटीजीएस-एनईएफटीसह अनामत रकमेसह अर्ज भरण्याची मुदत 28 जूनऐवजी 10 जुलै अशी होण्याची शक्यता आहे. या मुदतवाढीमुळे 18 जुलैला होणारी सोडत पुढे जाणार आहे. त्यामुळे अर्जविक्री-स्वीकृतीला मुदतवाढ मिळाल्यास आता सोडतही लांबणीवर जाणार आहे. नियोजित 18 जुलैला होणारी सोडत आता जुलैच्या शेवटच्या आठवड्यात किंवा ऑगस्टच्या पहिल्या आठवड्यात होण्याची शक्यता आहे. यावेळी म्हाडाची ही घरे गोरेगाव पहाडी, विक्रोळीच्या कन्नमवारनगर, अँटॉप हिल, बोरिवली, मालाड, दादर, सायन, परळ, ताडदेवमध्ये आहेत. 22 मेपासून नोंदणी, अर्ज विक्री-स्वीकृतीच्या प्रक्रियेला सुरुवात झाली आहे.
हेही वाचा – Patna meeting : लोकशाहीवर हल्ला करणाऱ्याला आम्ही विरोध करू; उद्धव ठाकरेंचा भाजपावर निशाणा
मुंबई मंडळाचे मुख्य अधिकारी मिलिंद बोरीकर यांनी पत्रकारांशी बोलताना सांगितले की, चार वर्षांनंतर 4 हजार 82 घरांची सोडत जाहीर झाली असून यासाठी -स्वीकृती प्रक्रिया सुरू आहे. यंदा पाहिल्यांदाच नव्या संगणकीय प्रणालीसह आणि नव्या बदलासह सोडत काढण्यात येत आहे. नव्या प्रक्रियेनुसार आवश्यक कागदपत्रे अर्ज करतानाच सादर करणे बंधनकारक आहे. अशावेळी कागदपत्रं वेळेत उपलब्ध होत नसल्यानं अनेक इच्छुकांना अर्ज करणं शक्य होत नाही. त्यामुळेच सोडतीला प्रतिसादही कमी मिळाला. या पार्श्वभूमीवर मंडळानं सोडतपूर्व प्रक्रियेला मुदतवाढ देण्याचा निर्णय घेतला आहे. लवकरच मुदतवाढ देण्याच्या प्रस्तावाला उपाध्यक्षांची मंजुरी मिळेल, अशी माहिती मिलिंद बोरीकर यांनी दिली. प्रस्ताव मंजूर झाल्याबरोबर मुदतवाढीची अधिकृत घोषणा केली जाईल असेही त्यांनी सांगितले.
