मुंबई : गेल्या काही दिवसांपासून मुंबईतील प्रदूषणामध्ये मोठी वाढ झाली आहे. यामुळे मुंबईकरांना श्वसनाला त्रास होण्याची समस्या जाणवू लागली आहे. त्यामुळे मुंबईच्या हवेतील प्रदूषण कमी करणे आणि मुंबईतील हवा निरोगी ठेवणे हे मोठे आव्हान मुंबई महानगरपालिकेसमोर आहे. त्यानुसार, मुंबई पालिका अधिकाऱ्यांनी ठोस पाऊले उचलण्यास सुरुवात केली आहेत. मात्र, या प्रदूषणाला आळा घालण्यासाठी वापरण्यात येणारी व्यवस्थाच कुचकामी ठरू लागली आहे. कारण, हवेची गुणवत्ता तपासण्यासाठी मुंबई महापालिकेकडे फक्त एकच व्हॅन आहे आणि ती सुद्धा नादुरुस्त असल्याची माहिती समोर आली आहे. (Mumbai Pollution The system for pollution control is ineffective)
मुंबईत मागच्या अनेक दिवसांपासून हवेची गुणवत्ता बिघडली आहे. याचा फटका थेट मुंबईकरांना बसताना पाहायला मिळत आहे. मुंबईत पायाभूत सुविधा, नवे विकास प्रकल्पाची बांधकामे मोठ्या प्रमाणावर सुरू आहेत. त्यातून तयार होणारी धूळ हवेचा दर्जा ढासळण्यास कारणीभूत ठरत आहे. याच जोडीला वाहनातून बाहेर पडणाऱ्या धुरांमध्ये अति-अतिसूक्ष्म कण असतात. या कारणांमुळे मुंबईच्या हवेवर परिणाम होत आहे. ज्यामुळे शहरावर धूसर हवेच सावट आल्याने मुंबईकरांचा श्वास गुदमरत आहे का? असा प्रश्न निर्माण झाला आहे. तर मुंबईचे स्वास्थ्य आता बिघडू लागले आहे का? असाही प्रश्न निर्माण झाला आहे. मुंबईच्या दैनंदिन हवेच्या गुणवत्ता अहवालानुसार, रविवारी मुंबईचा AQI 150 पर्यंत पोहोचला आहे. जो गंभीर श्रेणीतील आहे. केंद्रीय प्रदूषण मंडळाच्या मार्गदर्शक आकडेवारीनुसार, 0-50 या श्रेणीतील AQI चांगला समजला जातो. 52-100 हा समाधानकारक श्रेणीत गणला जातो, तर त्याहून अधिक गंभीर श्रेणीत मोजला जातो.
हेही वाचा… Maharashtra Weather : मुंबईकर थंडीच्या प्रतीक्षेत, पण राज्यातील इतर भागांत तपमानाचा पारा घसरला
महत्त्वाची बाब म्हणजे मुंबईतील हवेची गुणवत्ता तपासण्यासाठी पालिकेने नव्या चार मोबाईल व्हॅन खरेदी करण्याचा प्रस्ताव समोर ठेवला आहे, पण अद्यापही त्याला कोणतीही मंजुरी मिळालेली नाही. तसेच हवेची गुणवत्ता तपासासाठी आता महापालिकेजवळ असलेल्या 28 सनियंत्रणावर अवलंबून आहे, यात आणखी 5 सनियंत्रण घेण्याचा प्रस्ताव पालिकेने ठेवला आहे. मुंबईची परिस्थिती आणि परीघ पाहता 70 सनियंत्रण असणे गरजेचे आहे. बांधकाम साइटवर हवेची गुणवत्ता निर्देशांक मोजणारी यंत्रणा व्यावसायिकांनी स्वतः बसवावी, अशा सूचना व्यवसायिकांना देण्यात आल्या आहेत. तर अधिकाऱ्यांनी जाऊन ती पाहावी अशी निर्देश नुकतेच काढले आहेत. पण त्याबाबतही कोणतेच काम होत नसल्याची माहिती समोर आली आहे.
