ठाणे पोलीस दलात कोरोनाने प्रवेश केल्यानंतर पोलिसांमध्ये चिंतेचे वातावरण पसरले होते. मात्र सोमवारी ठाणे पोलीस दलाला एक दिलासा देणारी बातमी मिळाली. कोरोनाची बाधा झालेले मुंब्रा पोलीस ठाण्याचे वरिष्ठ पोलीस निरीक्षक हे या आजारातून पूर्णपणे बरे झाले असून त्यांना सोमवारी रुग्णालयातून सुट्टी देण्यात आली आहे. या वरिष्ठ अधिकाऱ्याच्या स्वागतासाठी ठाणे पोलीस दलाचे काही अधिकारी अंधेरी येथील सेव्हन हिल्स येथे दाखल झाले होते. कोरोना या आजाराशी लढा देऊन पूर्णपणे बरे झालेले या वरिष्ठ पोलीस निरीक्षकांचे पुष्पगुच्छ देऊन स्वागत करण्यात आले. कोरोना या आजारातून बरे झालेले मुंब्रा पोलीस ठाण्याचे हे दुसरे अधिकारी आहेत.
मुंब्रा पोलीस ठाण्याचे वरिष्ठ निरीक्षक यांनी तब्बल १५ दिवस कोरोना आजाराशी सामना केला, रविवारी त्यांचे तपासणी करण्यात आली असता त्यात ते निगेटिव्हआले. या आजारातून पूर्णपणे बरे झालेल्या अधिकाऱ्यांना सोमवारी रुग्णालयातून सुट्टी देण्यात आली. त्यांच्या स्वागतासाठी ठाणे पोलीस दलातील गुन्हे शाखेचे वरिष्ठ पोलीस निरीक्षक नितीन ठाकरे आणि इतरानी रुग्णालयाच्या आवारातच त्यांना पुष्पगुच्छ देऊन त्यांचे स्वागत केले. काही दिवसापूर्वीच मुंब्रा पोलीस ठाण्याच्या आणखी एक अधिकारी कोरोना या आजारातून पूर्णपणे बरे होऊन रुग्णालयातून घरी परतले आहे.
