दैनिक पुण्यनगरीचे संस्थापक-संपादक मुरलीधर अनंता उर्फ बाबा शिंगोटे यांचे आज निधन झाले. त्यांचे जन्मगाव असलेल्या गायमुख वाडी तालुका जुन्नर येथे त्यांनी अखेरचा श्वास घेतला. ते ८२ वर्षांचे होते. त्यांच्या पश्चात पत्नी, तीन मुले, तीन मुली, सुना, नातवंडे असा परिवार आहे. त्यांच्या पार्थिवावर जन्मगावी सामाजिक अंतर राखण्यासंबंधी नेमून दिलेल्या नियमांचे पालन करुन अंत्यसंस्कार होणार आहेत.
बाबांचा जन्म पुणे जिल्ह्यातील जुन्नर तालूक्यातील उंब्रज या गावी ७ मार्च १९३८ ला झाला होता. इयत्ता चौथी शिक्षण झालेल्या बाबांनी शिक्षण अर्धवट सोडल्यानंतर नोकरी-व्यवसायासाठी मुंबई गाठली. त्या ठिकाणी सुरुवातीला फळ विक्री त्यानंतर बुवाशेठ दांगट यांच्याकडे वृत्तपत्र टाकण्याचे काम सुरू केले होते. संयुक्त महाराष्ट्राच्या चळवळीसाठी मुंबईतल्या फाऊंटन परिसरात आंदोलन झाले होते, त्याचे बाबा साक्षीदार होते.
वृत्तपत्र विकताना सर्वसामान्यांना समजेल आणि वाचता येईल अशा भाषेतले वृत्तपत्र काढण्याचे स्वप्न त्यांनी उराशी बाळगले होते. १९९४ मध्ये मुंबई चौफेर नावाचे दैनिक सुरू केले. यानंतर दैनिक आपला वार्ताहर, दैनिक यशोभुमी, दैनिक कर्नाटक मल्ला, तामिळ टाईम्स, हिंदमाता ही दैनिके सुरु केली. यातल्या दैनिक पुण्यनगरीची मुहूर्तमेढ १९९९ मध्ये रोवली. मराठी भाषिक वृत्तपत्रांसोबत इतर भाषिक दैनिक प्रकाशित करणारे मुरलीधर शिंगोटे हे एकमेव होते.
‘वृत्तपत्रसृष्टीतील प्रेरणादायी प्रवास थांबला’ – CM
वृत्तपत्र विक्रेता ते वृत्तपत्र समुहाचा सर्वेसर्वा असा प्रेरणादायी प्रवास पुण्यनगरी वृत्त समुहाचे संस्थापक-संपादक मुरलीधर शिंगोटे यांच्या निधनामुळे थांबला आहे. त्यांची मराठी वृत्तपत्र क्षेत्रातील वाटचाल यापुढेही अनेकांसाठी निश्चितच मार्गदर्शक ठरेल, अशा शब्दांत मुख्यमंत्री उद्धव ठाकरे यांनी श्रध्दांजली वाहिली आहे. शिंगोटे बाबांकडे कष्टाळू वृत्ती होती. मुंबईत येऊन फळ विक्रेता, वृत्तपत्र विक्रेता अशी कष्टाची काम करतानाही शिंगोटे बाबांनी स्वतःचे वृत्तपत्र असावे, असा ध्यास घेतला. ते संयुक्त महाराष्ट्र चळवळीचेही साक्षीदार होते. त्यांनी सर्वसामान्यांना समजेल आणि आवडेल अशा भाषेत वृत्तपत्र प्रकाशित करणे सुरु केले. त्यातूनच त्यांच्या वृत्तपत्र समुहाचा विस्तार झाला. मराठी सोबतच अन्य भाषांत दैनिक प्रकाशित करणारे ते एकमेव मराठी होते. त्यांचा वृत्तपत्र विक्रेता ते वृत्त समुहाचा सर्वेसर्वा असा प्रवास प्रेरणादायी असाच आहे. त्यांची वाटचाल यापुढेही अनेकांसाठी निश्चितच मार्गदर्शक ठरेल. त्यांच्या निधनामुळे वृत्तपत्रसृष्टीतील प्रेरणादायी प्रवास थांबला, असे मुख्यमंत्री म्हणाले आहेत.
राजकीय क्षेत्रातील मंडळींनी मुरलीधर शिंगोटे यांना वाहिली भावपूर्ण श्रद्धांजली!
जेमतेम चौथीपर्यंत शिक्षण. व्यवसायासाठी मुंबई गाठणे, फळविक्री, वर्तमानपत्रांचे वितरक ते पुण्यनगरीचे मालक. या समूहात मुंबई चौफेर, आपला वार्ताहर, यशोभूमी, कर्नाटक मल्ला अशी इतरही वृत्तपत्रे आहेत.
श्री मुरलीधर शिंगोटे यांना माझी विनम्र श्रद्धांजली.
परिवाराच्या दु:खात मी सहभागी आहे!— Devendra Fadnavis (@Dev_Fadnavis) August 6, 2020
पुण्यनगरी वृत्तपत्र समूहाचे संस्थापक मुरलीधर बाबा शिंगोटे यांच्या निधनाचे वृत्त अत्यंत दु:खद आहे. वृत्तपत्र विक्रेता ते वृत्तपत्र समुहाचे मालक हा त्यांचा प्रवास प्रेरणादायी आहे.
मुरलीधर शिंगोटे यांना भावपूर्ण श्रद्धांजली!
काँग्रेस पक्ष शिंगोटे कुटुंबियांच्या दु:खात सहभागी आहे. pic.twitter.com/vFfM2v7PUy— Balasaheb Thorat (@bb_thorat) August 6, 2020
दैनिक पुण्यनगरीचे संस्थापक-संपादक मुरलीधर अनंता उर्फ बाबा शिंगोटे यांना माझी भावपूर्ण श्रद्धांजली. संयुक्त महाराष्ट्र चळवळीचे साक्षीदार राहिलेले बाबा हे शुन्यातून विश्व निर्माण केलेले असे एक आदर्श व्यक्तिमत्त्व होते.
— Nitin Gadkari (@nitin_gadkari) August 6, 2020