‘कोरेगाव भीमा दंगलीच्या तपास प्रकरणी राष्ट्रवादी काँग्रेसचे ज्येष्ठ नेते शरद पवार यांची भूमिका दुटप्पी आहे’, असा आरोप भारतीय जनता पार्टीचे प्रदेश मुख्य प्रवक्ते माधव भांडारी यांनी सोमवारी पत्रकार परिषदेत बोलताना केला. गेल्या काही दिवसांपासून राष्ट्रवादी काँग्रेस आणि काँग्रेसच्या काही नेत्यांनी कोरेगाव भीमा दंगलीसंदर्भात काही व्यक्ती आणि संघटनांवर आरोप करणे सुरु केले आहे. या दंगलीचा तपास राष्ट्रीय तपास यंत्रणेकडे (एनआयए) सोपविण्याचा केंद्र सरकारच्या निर्णयावरही पवार आणि राष्ट्रवादीच्या जबाबदार नेत्यांनी टीका केली आहे. मात्र, या याप्रकरणी तपास करणाऱ्या चौकशी आयोगापुढे सादर केलेल्या शपथपत्रात मात्र, पवार यांनी आपण या संदर्भात कोणा व्यक्ती अथवा संघटनेवर आरोप करू इच्छित नाही, असे स्पष्टपणे नमूद केले होते.
एनआयएकडे चौकशी सोपविण्याच्या निर्णयावर टीका
दरम्यान, ‘आता राज्यात सत्तेत आल्यानंतर पवारांची भूमिका अचानक बदलली आणि आता त्यांच्या पक्षाचे नेते काही व्यक्ती आणि संघटनांवर आरोप करू लागले आहेत’, हे आश्चर्यजनक असल्याचे माधव भंडारी म्हणालेत.
‘पवार यांनी या प्रकरणाचा तपास विशेष पथकाकडे (एसआयटी) सोपवावा, अशी मागणी केली होती. सध्या हा तपास राज्य पोलिसच करत आहेत. हेच पवार या घटनेची चौकशी एनआयएकडे सोपविण्याचा केंद्राच्या निर्णयावरही टीका करत आहेत, मग पवार यांचा नेमका विश्वास आहे तरी कोणावर असा सवालही भांडारी यांनी उपस्थित केला आहे. याच शपथपत्रात पवार यांनी समाज माध्यमांवर निर्बंध आणण्याची मागणी केली होती, याकडेही त्यांनी लक्ष वेधल आहे.
हेही वाचा – चव्हाण म्हणतात, ‘सेनेने लिहून दिलं’; शिंदे म्हणतात ‘अजिबात नाही’!
