मुसळधार पाऊस आणि दाट धुकं यामुळे आज पहाटे मुरबाड येथील माळशेज घाटात दरड कोसळळ्याची घटना घडली आहे. या घटनेनंतर खबरदारीम्हणून येथील वाहतूक काही वेळेसाठी बंद करण्यात आली आहे. माळशेज घाटातील छत्री पाईंट परिसरात दरड कोसळली आहे. या घटनेत एक ट्रक चालक जखमी झाला असून वाहतूकीचा रस्ता बंद करण्यात आला. अमोल दहिफळे असे या ट्रक चालकाचे नाव असून तो पाथर्डी येथील रहिवाशी आहे. घटनेनंतर चालकाला उपचारासाठी माऊली रुग्णालयात दाखल करण्यात आले आहे. माळशेज घाटातून कल्याण आणि इतर ठिकाणी जाणारी वाहतूक आता पुणे आणि नाशिकच्या दिशेने वळवण्यात आली आहे. सध्या दरड हटवण्याचे काम सुरु आहे. मात्र, दाट धुक्यामुळे दरड हटवण्याच्या कामात अडथळा निर्माण झाला असल्याचे सांगण्यात आले.
राष्ट्रीय महामार्ग २२२ माळशेज घाटाहून जातो. कल्याणहून अहमदनगर येथे जाणारी वाहतूक कसारा घाटातून वळवण्यात आली आहे. माळशेज घाटात मुसळधार पाऊस आणि धुकं असल्यामुळे अनेकदा येथे दरड कोसळण्याच्या घटना घडतात. या घटनेनंतर रस्त्यावरुन दरड काढण्याचा प्रयत्न सुरु करण्यात आला असल्याचे अधिकाऱ्यांनी सांगितले आहे. यामार्गाने प्रवास करणाऱ्यांनी माळशेज घाटातून प्रवास करणे टाळावा असे आवाहन करण्यात आले.