मुंबई : शाळेतील विद्यार्थ्यांचे आरोग्य सुदृढ राहावे यासाठी मुंबई महापालिकेच्या शिक्षण व आरोग्य विभाग यांच्या संयुक्त विद्यमाने तसेच अन्न सुरक्षा आणि मानक प्राधिकरण (fssai) व इंडियन पेडट्रिशिअन असोसिएशन (IPA) यांच्या सहकार्यातून ‘संकल्प संपूर्ण स्वास्थ्य’ या कार्यक्रम अंतर्गत 8 ते 13 वर्षे वयोगटातील विद्यार्थ्यांना आहार तज्ज्ञांद्वारे मार्गदर्शन करण्यात येणार आहे. 23 नोव्हेंबर रोजी सकाळी 10 वाजता भायखळा येथील अण्णाभाऊ साठे नाट्यगृहातील सभागृहात हे शिबिर होणार आहे. राज्याचे शालेय शिक्षण व मराठी भाषा मंत्री तथा मुंबई शहर जिल्हा पालकमंत्री दीपक केसरकर यांच्या हस्ते शिबिराचे उद्घाटन करण्यात येणार असल्याची माहिती देण्यात आली आहे. (Students in Mumbai municipal schools will get guidance from experts regarding diet)
हेही वाचा – अजित पवारांकडून दाखल प्रतिज्ञापत्रात शरद पवारांना विरोधच नाही; सुनावणीनंतर माहिती उघड
मुंबई महापालिका आयुक्त तथा प्रशासक इकबाल चहल यांच्या मार्गदर्शनाखाली आणि अतिरिक्त आयुक्त (पूर्व उपनगरे) आश्विनी भिडे, सह आयुक्त (शिक्षण) गंगाथरण डी. यांच्या निर्देशानुसार महापालिकेचा शिक्षण विभाग विविध उपक्रम हाती घेत असतो. शालेय अभ्यासक्रमाबरोबरच विद्यार्थ्यांचे आरोग्यही सुदृढ राहावे यासाठी महापालिकेच्या शिक्षण विभागाने ‘संकल्प संपूर्ण स्वास्थ्य’ या कार्यक्रमाच्या अंतर्गत हा उपक्रम हाती घेतला आहे. या शिबिराच्या उद्घाटनाला उप आयुक्त (परिमंडळ 2 तथा शिक्षण) रमाकांत बिरादार उपस्थित राहणार आहेत. उद्घाटन झाल्यानंतर आहारतज्ज्ञ विद्यार्थ्यांना प्रशिक्षण देणार आहेत. तसेच आहाराबाबत प्रश्नमंजुषेचा कार्यक्रम देखील होणार आहे.
कार्यक्रमाच्या उद्घाटनानंतर पुढील सहा दिवस महापालिकेच्या सर्व शाळांमध्ये विद्यार्थी व शिक्षक यांना आहाराबाबतचे तज्ज्ञांद्वारे प्रत्यक्ष प्रशिक्षण देण्यात येणार आहे. त्यात 24 नोव्हेंबर रोजी महापालिकेच्या ‘ए’, ‘बी’, ‘सी’, ‘डी’ आणि ‘इ’ विभागातील विद्यार्थी आणि शिक्षकांसाठी जगन्नाथ शंकरशेठ शाळेत, 28 नोव्हेंबर रोजी ‘जी/ उत्तर’ आणि ‘जी/दक्षिण’ विभागातील विद्यार्थी व शिक्षकांसाठी भवानी शंकर रोड महापालिका शाळेत प्रशिक्षण सत्र होईल. तसेच 30 नोव्हेंबर रोजी ‘एफ/दक्षिण’ आणि ‘एफ/उत्तर’ विभागातील विद्यार्थी आणि शिक्षकांसाठी एल.के.वाघजी केंब्रिज महापालिका शाळेतदेखील आहारतज्ज्ञांद्वारे प्रशिक्षण देण्यात येणार आहे, असे महापालिकेचे शिक्षणाधिकारी (प्राथमिक) राजेश कंकाळ, शिक्षणाधिकारी (माध्यमिक) राजू तडवी यांनी कळविले आहे.
महापालिकेतील 600 विद्यार्थी व 50 शिक्षकांना या प्रशिक्षणाचा लाभ मिळणार आहे. तसेच मुंबई महापालिका क्षेत्रातील इतर सर्व शाळांमधील विद्यार्थी, शिक्षक पालक यांना या कार्यक्रमाचा यूट्यूब लिंकद्वारे ऑनलाईन माध्यमातून प्रशिक्षणाचा लाभ मिळणार आहे. महापालिकेच्या 450 शालेय इमारतींमधील 1 हजार 150 शाळांमध्ये व्हर्च्युअल क्लासरूम तसेच डिजिटल क्लासरूमच्या माध्यमातून सदर कार्यक्रमाच्या थेट प्रक्षेपणाचा लाभ विद्यार्थी व शिक्षकांना होणार असल्याची माहिती देण्यात आली आहे.
