या बैठकीत सहभागी प्रत्येक पदाधिकाऱ्यांनी आपले मनोगत व्यक्त केले. पदाधिकाऱ्यांनी यावेळी साध्या पध्दतीने गणेशोत्सव साजरा करण्याचा निर्धार केला. तसेच काही पदाधिकाऱ्यांनी मुर्तिकारांचे होणारे नुकसान लक्षात घेता मुर्तिकारांच्या पाठीशी शासनाने ठामपणे उभे राहून अनुदान देण्याची मागणी केली. घरगुती श्री. गणेशाची प्रतिष्ठापना करण्यावर अनेकांनी मत व्यक्त केले.
महापौरांनी सर्व पदाधिकाऱ्यांचे म्हणणे ऐकून घेतल्यानंतर सर्व मंडळाच्या पदाधिकाऱ्यांनी यावर्षी सहकार्य करण्याचे आवाहन केले. मुख्यमंत्री यांच्याशी सार्वजनिक गणेश उत्सवाबाबत चर्चा करुन विविध अडचणीबद्दल तोडगा काढण्याचे आश्वासन यावेळी महापौरांनी दिले. त्यासोबतच एकमताने राज्यशासनाचे पुढील दिशानिर्देश आल्यानंतर त्याप्रमाणे निर्णय घेऊ, असे आश्वासनही महापौरांनी दिले.
याप्रसंगी सार्वजनिक गणेशोत्सव समन्वय समितीचे (उपनगरे) सचिव डॉ. विनोद घोसाळकर, सार्वजनिक गणेशोत्सव समन्वय समितीचे प्रमुख कार्यवाह गिरीश वालावलकर, गणेश मूर्तीकार संघाचे अध्यक्ष गजानन तोंडवळकर, लालबाग गणेश मंडळाचे मानद सचिव सुधीर, साळवी, उप आयुक्त व गणेशोत्सवाचे समन्वयक नरेंद्र बरडे तसेच अशोक पवार, रामनाथ केणी, मंगेश दळवी आदी मान्यवर या बैठकीस उपस्थित होते.