अग्निशमन दलाचे वडाळा येथील केंद्र लवकरच कात टाकणार आहे. यासंदर्भातील प्रस्ताव स्थापत्य समितीच्या ( शहर) बैठकीत मंजुरीसाठी येणार आहे. वडाळा येथे मुंबई अग्निशमन दलाचे प्रादेशिक समादेश केंद्र परिमंडळ -२, परिमंडळ ५, वडाळा प्रशिक्षण केंद्र आणि वडाळा अग्निशमन केंद्र इत्यादी महत्वाची कार्यालये आहेत. याठिकाणी अधिकारी, कर्मचारी यांची निवासस्थाने व जलतरण तलाव आहे.
या अग्निशमनदलाच्या नजीकच झोपडपट्टी आहे. अग्निशमनदल केंद्राच्या ठिकाणी अधिकारी, कर्मचारी वसाहत व अग्निशमन केंद्र असून त्यांच्या सुरक्षिततेच्या दृष्टिकोनातुन त्याठिकाणी संरक्षक भिंत उभारण्याचे काम करण्यात आले आहे. या वडाळा अग्निशमन केंद्र परिसरातील कुंपण भिंतीलगत दिव्याचे खांब व भिंतीवर दिवे आणि वीज विरोधक यंत्रणेसह सीसीटीव्ही कॅमेरे बसविण्यात येणार आहेत.
या अग्निशमन दलाच्या केंद्राचे अद्यावतीकरणाचे काम मेसर्स चैत्रा इलेक्ट्रिकल अँड इंजिनिअरिंग या कंत्राटदाराला पालिका कार्यालयीन अंदाजित कंत्राट रकमेच्या ३.०६% कमी दराने कंत्राट काम देण्यात येणार आहे. या कंत्राटदाराला सदर काम प्रस्तावाला मंजुरी मिळाल्यानंतर व त्याबाबतचे वर्कऑर्डर दिल्यानंतर पुढील ९ महिन्यात अग्निशमन दलाच्या अद्यावतीकरणाचे काम करण्यात येणार आहे. त्यासाठी पालिकेला १ कोटी ५१ लाख रुपयांचा खर्च येणार आहे. याच कंत्राटदाराला या अग्निशमनदल केंद्राची देखभाल पुढील ५ वर्षे करायची आहे.
हेही वाचा : ऑमिक्रॉन व्हेरियंटच्या पार्श्वभूमीवर मुंबईत सर्वतोपरी दक्षता घ्या, आयुक्त डॉ. इक्बाल सिंह यांच्या सूचना
