भाईंदर : मीरा- भाईंदर महापालिकेत कार्यरत असलेल्या महिलांना आक्षेपार्ह मजकूर मोबाईलवर पाठवून कर्मचारी महिलेचा लैंगिक छळ करण्याचा प्रयत्न केल्या प्रकरणी दोन पुरुष कर्मचार्यांना निलंबित करण्यात आले आहे. महापालिकेने स्थापन केलेल्या विशाखा समितीने हा निर्णय घेतला आहे. यामुळे कर्मचार्यांना पालिकेकडून जोरदार झटका दिला आहे.
शासकीय, निमशासकीय व खासगी सेवेतील महिला कर्मचार्यांच्या लैंगिक छळाच्या तक्रारींची दखल घेण्यासाठी सर्वच कार्यालयात आणि संस्थांमध्ये महिला तक्रार निवारण समित्या स्थापन करण्याचे शासनाने आदेश दिले आहेत. या समित्यांना ’विशाखा समिती’ म्हणूनही संबोधले जाते. त्यानुसार मीरा -भाईंदर महापालिकेत देखील महिला व बालकल्याण विभागामार्फत ’विशाखा समिती’ स्थापन करण्यात आली आहे. या समितीत महिला सदस्यांसह आस्थापना विभागाचे सहायक आयुक्त सुनील यादव यांचा समावेश करण्यात आला आहे. त्यावरून आलेल्या प्राप्त तक्रारीची दखल घेत ही समिती आपला चौकशी अहवाल तयार करत असते व त्यात दोषारोपपत्र वरिष्ठांना सादर करत असते.
१ जानेवारी २०२४ ते ३० नोव्हेंबर २०२४ दरम्यान अकरा महिन्याच्या कालावधीत या समितीमार्फत दोन प्रकरणे निकालात काढण्यात आल्याची माहिती समोर आली आहेत. यात महापालिकेच्या आवक-जावक विभाग आणि वैद्यकीय विभागात महिलांशी गैरवर्तन करणार्या दोन पुरुष कर्मचार्यांवर ही कारवाई करण्यात आली आहे. यातील एक कर्मचारी कायमस्वरूपी पदावर असल्याने त्याला निलंबित करण्यात आले आहे. तर दुसरा कंत्राटी पद्धतीवर असल्याने त्याला थेट बडतर्फ करून टाकण्यात आले आहे. या दोन्ही प्रकरणात सखोल चौकशी केल्यानंतर हा निर्णय घेतला असल्याची माहिती विशाखा समितीच्या प्रमुख तथा उपायुक्त कल्पिता पिंपळे यांनी दिली आहे.
नेमकी घटना काय ?
आवक-जावक विभागात कार्यरत असलेल्या एका पुरुष कर्मचार्याने त्याच विभागात काम करणार्या महिलेला स्वतःचीच अश्लिल छायाचित्र मोबाईलवर पाठवली होती. त्यामुळे महिलेने याबाबतची तक्रार विशाखा समितीकडे केली होती. यात समितीने चौकशी केल्यानंतर त्या कर्मचार्याने आपण चुकीच्या हेतूने हे कृत केल्याचे मान्य केले होते. त्यामुळे त्यावर निलंबनाची कारवाई करण्यात आली आहे. तसेच या कर्मचार्यांचे मानसिक संतुलन तपासण्यासाठी मनोरुग्णतज्ञ डॉक्टरांकडे शिफारस करण्यात आली आहे. तर दुसर्या प्रकरणात वैद्यकीय विभागात कार्यरत असलेल्या एका महिला कर्मचार्याला त्याच ठिकाणी काम करणार्या एका कंत्राटी कर्मचार्याकडून लैंगिक तसेच मानसिक त्रास देण्याचा प्रयत्न केला असल्याची तक्रार आली होती. त्यावर देखील चौकशी करून सदर कर्मचार्याला थेट कामावरून काढण्याचा व पिडीत महिलेची अन्य विभागात बदली करण्याचा निर्णय घेतला असल्याची माहिती विशाखा समितीच्या सदस्याकडून देण्यात आली आहे.
महिलेची तक्रार ही गुप्तपणे केली जाते. त्यामुळे निलंबित कर्मचार्याने नाव देत नाहीत. तसेच जर नाव उघड केले तर गुन्हा दाखल होतो व यातून महिलेची ओळख उघड होते. त्यामुळे नाव देऊ शकत नाही.
– कल्पिता पिंपळे, माहिती उपायुक्त
