वसईः सार्वजनिक गणेश मंडळांना महावितरणकडून तात्पुरत्या स्वरुपात आणि त्वरित वीजजोडणीची सुविधा उपलब्ध केली आहे. या जोडणीसाठी घरगुती वीजदर आकारण्यात येणार आहे. तरी सार्वजनिक गणेश मंडळांनी या सुविधेचा लाभ घेत अधिकृत वीजजोडणी घेऊनच विजेचा वापर करावा, असे आवाहन महावितरणने केले आहे. गणेशोत्सव काळात कोणत्याही प्रकारचे वीज अपघात होऊ नये, यासाठी मंडप, रोषणाई व देखाव्यांची उभारणी करताना लघुदाब व उच्चदाब विद्युत वाहिन्या, वितरण रोहित्रे आदी यंत्रणेपासून सुरक्षित अंतर राखावे. मंडपातील वीज संच मांडणी करताना विद्युत सुरक्षा नियमांचे काटेकोरपणे पालन करावे. मंडपातील वीज संच मांडणी मान्यताप्राप्त विद्युत कंत्राटदारांकडून करून घ्यावी. गणेश मंडळांनी विद्युत सुरक्षा उपाययोजनांमध्ये तडजोड करू नये. आपात्कालीन स्थितीकरिता कार्यक्षेत्रातील महावितरणच्या शाखा अभियंत्यांचे मोबाईल क्रमांक नोंदवून ठेवावेत. याबरोबरच महावितरणच्या मध्यवर्ती ग्राहक सुविधा केंद्राचे १९१२, १८००-२१२-३४३५ व १८००-२३३-३४३५ हे टोल फ्री क्रमांक ग्राहकांच्या सेवेत २४ तास उपलब्ध असून त्यावर संपर्क करण्याचे आवाहन महावितरणने केले आहे.
ही कागदपत्रे आवश्यक
गणेश मंडळांना तात्पुरत्या स्वरूपातील वीज जोडणीसाठी नोंदणी प्रमाणपत्र, स्थानिक स्वराज्य संस्थेची मंडप परवानगी, पोलीस स्थानक परवाना, विद्युत निरीक्षक यांचे वीजसंच सुरक्षित असल्याचे प्रमाणपत्र, वीज मागणी अर्ज, वीजसंच मांडणी चाचणी अहवाल आणि राष्ट्रीयकृत बँक खाते पासबुक छायांकित प्रत आदी कागदपत्र आवश्यक आहेत. गणेश मंडळांनी आवश्यक कागदपत्रांसह नजिकच्या महावितरण कार्यालयाशी संपर्क साधावा.
एक खिडकी योजना
गणेशोत्सव साजरा करणार्‍या मंडळाने लागणार्‍या परवानग्यांसाठी वसई -विरार महापालिकेने एक खिडकी योजना सुरु केली आहे. त्याचबरोबर ऑनलाईन अर्ज करण्याची सुविधाही उपलब्ध करून देण्यात आली आहे. गणेशोत्सव मंडळांना महापालिकेच्या संकेतस्थळावर व क्यूआर कोडद्वारे ऑनलाइन स्वरूपात अर्ज करता येणार आहे. या अर्जाची महापालिकेकडून प्राथमिक तपासणी करून पोलीस विभाग, वाहतूक नियंत्रण शाखा, महाराष्ट्र राज्य विद्युत वितरण कंपनी व अग्निशमन विभाग यांच्याकडे पोर्टलद्वारे पाठवला जाणार आहे. त्यांच्याकडून परवानग्या व नाहरकत प्रमाणपत्र प्राप्त झाल्यानंतर गणेशोत्सव मंडळांना ऑनलाइन पोर्टलद्वारे परवानगी दिली जाईल.
