चहासाठी प्रहारच्या जिल्हाध्यक्षाचा महासभेत धुमाकूळ; पोलिसांकडून अटक

ही अत्यंत दुर्दैवी घटना आहे.  जोपर्यंत त्या इसमावर गुन्हा दाखल होत नाही. तोपर्यंत मी महासभेच्या सभागृहात पाय ठेवणार नाही. महाराष्ट्र सुरक्षा बलांच्या कर्मचाऱ्यांवरही कारवाई होऊन निलंबन होत नाही, तोपर्यंत महासभेत जाणार नाही. हा फक्त महासभेचा अपमान नसून संपूर्ण मीरा भाईंदर शहराला काळीमा फासणारी घटना आहे.
– ज्योत्स्ना हसनाळे, महापौर

महापालिकेच्या सुरक्षेसाठी दरवर्षी कोट्यवधी रुपये देऊन सुरक्षरक्षक नेमले जातात. महासभा सुरु असताना सभागृहात जाण्यास मनाई असते. असे असताना निकम सुरक्षा कवच भेदून थेट डायसपर्यंत पोहोचल्याने सुरक्षेचा मुद्दा ऐरणीवर आला आहे. डायसवर धुमाकूळ घालून महापौरांशीच वाद घालत असलेल्या निकम यांना सुरक्षारक्षक अडवू शकले नाहीत. अखेर नगरसेवक शिपायांच्या मदतीने महापौरांच्या मदतीसाठी धावून गेले. आयुक्तांना यापूर्वीही सुरक्षा व्यवस्थेची खबरदारी घ्यावी, असे सांगितले असतानाही खबरदारी घेतली नाही. प्रशासन महापौरांची सुरक्षितता घेऊ शकत नाहीत. सुरक्षा व्यवस्थेवर करोडो रुपये खर्च करत असताना सुरक्षा व्यवस्थेवर प्रशासनाचे कोणतेही नियंत्रण नाही. महापौरच सुरक्षित नाहीत, ही गंभीर बाब आहे. सुरक्षा व्यवस्था काय कामाची, असा संताप महापौर ज्योत्स्ना हसनाळे यांनी यावेळी व्यक्त केला. निकम यांना उपायुक्त मारुती गायकवाड यांच्या तक्रारीवरून भाईंदर पोलिसांनी ताब्यात घेतले असून त्यांच्यावर सरकारी कामात अडथळा, महापालिका सभागृहात विना परवानगी प्रवेश करणे, याबाबतचा गुन्हा दाखल केला जाणार असल्याची माहिती महापालिकेकडून देण्यात आली आहे.