भाईंदर :- केंद्र शासनाच्या त्रिभाषा सुत्रानुसार राज्यातील केंद्र शासनाच्या प्रत्येक कार्यालयात इंग्रजी व हिंदी बरोबरच मराठी भाषेचा वापर करणे बंधनकारक आहे. असे असताना देखील मीरारोड व भाईंदर रेल्वे स्थानकात प्रवाश्यांना आपले तिकीट बुकिंग करण्यासाठी इंग्रजीसह गुजराती भाषेतील आरक्षण अर्ज दिला जात आहे.असे करणे म्हणजे केंद्राच्या नियमाला हरताळ आणि मराठी भाषेचा अपमान केल्यासारखे आहे. याचा तीव्र विरोध करत मराठी भाषेत आरक्षण फॉर्म उपलब्ध करून देण्याची मागणी महाराष्ट्र नवनिर्माण सेनेने केली आहे. अन्यथा मनसेकडून आंदोलन करण्याचा इशारा देण्यात आला आहे. मीरा – भाईंदर शहराची लोकसंख्या दिवसेंदिवस मोठ्या प्रमाणात वाढत आहे. त्यामुळे मीरारोड व भाईंदर या रेल्वे स्थानकांमध्ये आरक्षण करण्यासाठी आरक्षण केंद्रांवर नागरिकांची गर्दी झालेली असते. यावेळी आरक्षणासाठी आलेल्या नागरिकांना तिकीट आरक्षणासाठी दिलेला अर्ज हा अनेकदा इंग्रजीत आणि गुजराती भाषेत असतो. त्यामळे मराठी भाषिक असणार्‍या नागरिकांना तो अर्ज भरणे अवघड जाते. त्यामुळे मराठी भाषिक नागरिकांनी संताप व्यक्त केला आहे.
महाराष्ट्रात मराठी ही महाराष्ट्राची राजभाषा असून केंद्र शासनाच्या प्रत्येक कार्यालयात इंग्रजी व हिंदी बरोबरच मराठी भाषेचा वापर करणे बंधनकारक आहे. असे असताना देखील भाईंदर रेल्वे स्थानकावरील रेल्वे आरक्षण फॉर्मवर मराठी भाषेऐवजी गुजराती भाषेचा पर्याय देण्यात आला आहे. ही बाब महाराष्ट्र नवनिर्माण सेनेच्या निदर्शनास येताच केंद्रशासनाने दिलेल्या आदेशाचे पालन करण्यात येत नसून राज्यातील सर्वसामान्य जनतेस रेल्वे आरक्षण फॉर्मवरील माहिती समजण्यासाठी इंग्रजी व हिंदी बरोबरच मराठी भाषा द्यावी अशी मागणी मनसे मीरा-भाईंदर शहर अध्यक्ष हेमंत सावंत यांनी रेल्वे प्रशासनाकडे निवेदनाद्वारे केली आहे. रेल्वे प्रशासनाने लवकरात लवकर नागरिकांना मराठी भाषेत अर्ज उपलब्ध करून दिले नाही तर मनसेच्या वतीने आंदोलन करण्याचा इशारा मनसेने दिला आहे. यावेळी निवेदन देताना शहराध्यक्ष हेमंत सावंत, उपशहराध्यक्ष लीला खडसे, माथाडी कामगार सेनेचे चिटणीस चंद्रशेखर जाधव, माथाडी कामगार सेनेचे उपचिटणीस किशोर येवले, शाखाध्यक्ष दिनेश वाढवाल, उप शाखा प्रमुख लक्ष्मण चौगुले इत्यादी उपस्थित होते.
