रेल्वे उड्डाणपूलासंदर्भात बैठक संपन्न

पालघर: विरार -डहाणू रेल्वे चौपदरीकरण, डेडिकेटेड फ्रंट कॉरिडोर, वेस्टर्न रेल्वे व सार्वजनिक बांधकाम विभाग यांची संयुक्त बैठक खासदार राजेंद्र गावित व जिल्हाधिकारी पालघर यांच्या अध्यक्षतेखाली घेण्यात आली. ही बैठक पालघर जिल्हाधिकारी कार्यालयात समिती सभागृहात पार पडली. या बैठकीत केळवे रोड येथील पूर्व -पश्चिम रेल्वे भुयारी मार्गात गेल्या अनेक दिवसापासून पावसाचे पाणी भरून असल्याने तसेच वंजारवाडा बोईसर येथे अंडरपास ऐवजी फ्लाय ओव्हर ब्रिज त्याचप्रमाणे, टेपाचापाडा साईनगर येथे पादचारी पुल संदर्भात प्रस्ताव तयार करण्याचे निर्देश संबंधित विभागाला देण्यात आले.कोकण विभागात पावसाचे प्रमाण अधिक असल्यामुळे पालघरसारख्या भागात सुद्धा पावसाचे प्रमाण जास्त असते. त्यामुळे या ठिकाणी रेल्वे भुयारी मार्ग न करता फ्लायओव्हर ब्रिज अथवा पादचारी पूल बांधावेत असे निर्देश संबंधितांना देण्यात आले. या करिता रेल्वे व सार्वजनिक बांधकाम विभाग यांनी एकत्रित प्रस्ताव तयार करावेत.तसेच खासदारांनी स्वतः वैयक्तिक रेल्वे बोर्डाशी संपर्क करून पाठपुरावा करणार असल्याचे सांगितले.