श्रावण महिना सुरू झाला की नागपंचमी आणि रक्षाबंधननंतर कृष्ण जन्माष्टमीचा सण साजरा केला जातो. हिंदू धर्मात कृष्ण जन्माष्टमीला विशेष महत्वपूर्ण मानले जाते. कारण या दिवशी भगवान कृष्णाचा जन्म झाला होता. त्यामुळेच श्रावणातल्या कृष्ण पक्षातील अष्टमी तिथीला कृष्णाष्टमी हा सण साजरा केला जातो. यावर्षी गुरूवारी,18 ऑगस्ट रोजी कृष्णाष्टमी साजरी केली जाईल. यादिवशी श्रीकृष्णाची पूजा करताना त्यांना अत्यंत प्रिय असणाऱ्या या 5 गोष्टी त्यांना अर्पण करा. ज्यामुळे ते तुमच्यावर खूश होऊन आर्शिवाद देतील.
पौराणिक मान्यतेनुसार, भगवान श्रीकृष्णांना लहानपणापासूनच लोणी आणि खडीसाखर खायला खूप आवडायची. त्यामुळे तुम्ही त्यांना कृष्णाष्टमीच्या दिवशी याचा नैवेद्य अर्पण करा.
श्रीकृष्णांना दुसरी प्रिय असणारी गोष्ट म्हणजे मोरपंख. श्रीकृष्ण त्यांच्या मुकुटावर मोरपंख धारण करतात. कृष्णाष्टमीच्या दिवशी त्यांना मोरपंख अर्पण केल्यास तुम्हाला नक्कीत त्यांचा आशिर्वाद प्राप्त होईल.
श्रीकृष्णांना बासरी देखील अत्यंत प्रिय आहे. कृष्णाष्टमीच्या दिवशी कृष्ण मंदिरात बासरी अर्पण केल्यास कृष्ण भगवान तुमच्यावर खूश होतील.
श्रीकृष्णांना गाय खूप प्रिय होती. त्यामुळे कृष्णाष्टमीच्या दिवशी गायीला हिरवा चारा खाऊ घाला किंवा श्रीकृष्णांची पूजा करताना गायीची मूर्ती देखील पूजेमध्ये ठेवून तिची पूजा करा.
श्रीकृष्णांना धन्याची पंजीरी देखील अत्यंत प्रिय आहे. धन्याचा संबंध धनाशी आहे असं मानले जाते. त्यामुळे कृष्णाष्टमीच्या दिवशी धन्याची पंजीरी अर्पण केल्यास धनाची कमतरता भासत नाही.
