मुख्यमंत्री फडणवीसांकडून दिल्लीतील नेत्यांना खास भेट; राजकीय वर्तुळात रंगली चर्चा
नवी दिल्ली : 2024 च्या विधानसभा निवडणुकीत भाजपचे ज्येष्ठ नेते देवेंद्र फडणवीस पुन्हा आले असून राज्याचे मुख्यमंत्री म्हणून त्यांचा शपथविधी देखील झाला आहे. मुख्यमंत्रिपदी विराजमान झाल्यानंतर देवेंद्र फडणवीस यांनी बुधवार आणि गुरुवारी दिल्ली दौरा केला. या दौऱ्यात त्यांनी दिल्लीतील महत्त्वाच्या राजकीय नेत्यांच्या सदिच्छा भेटी घेतल्या आहेत. या भेटीच्या माध्यमातून त्यांनी या नेत्यांना महाराष्ट्राच्या संस्कृतीचे दर्शन घडविले आहे. देवेंद्र फडणवीसांनी ज्या नेत्यांची भेट घेतली त्यांनी मूर्ती भेट केल्या आहेत, ज्याची राजकीय वर्तुळात चर्चा रंगली आहे.
दिल्ली दौऱ्यावर गेलेल्या मुख्यमंत्री देवेंद्र फडणवीस यांनी राष्ट्रीय राजकारणातील सात प्रमुख नेत्यांच्या भेटी घेतल्या. यामध्ये राष्ट्रपती, उपराष्ट्रपती, पंतप्रधान, केंद्रीय मंत्री यांचा समावेश आहे.
मुख्यमंत्री फडणवीसांनी राष्ट्रपती द्रौपदी मुर्मू आणि उपराष्ट्रपती जगदीप धनखड यांची भेट घेतली. या भेटीवेळी फडणवीसांनी त्यांना पंढरपूरच्या श्रीविठ्ठल – रुक्मिणीची मूर्ती दिली.
पंतप्रधान नरेंद्र मोदी यांना महाराष्ट्राचे आराध्य दैवत छत्रपती शिवाजी महाराज यांची मूर्ती भेट दिली. पंतप्रधान नरेंद्र मोदी यांनी त्यांच्या 2014 च्या लोकसभा निवडणुकीच्या प्रचाराची सुरुवात रायगड किल्ल्यापासून केली होती.
केंद्रीय गृहमंत्री अमित शाह यांची भेट घेत मुख्यमंत्री देवेंद्र फडणवीस यांनी त्यांना स्वातंत्र्यवीर सावरकर यांची मूर्ती भेट दिली.
केंद्रीय मंत्री राजनाथ सिंग आणि केंद्रीय रस्ते वाहतूक आणि महामार्ग मंत्री नितीन गडकरी यांना बुद्धी देवता श्रीसिद्धीविनायकाची मूर्ती भेट दिली आहे.
भाजपाचे राष्ट्रीय अध्यक्ष जे. पी. नड्डा यांना हिंदू संस्कृतीत पवित्र मानल्या जाणाऱ्या गाय-वासराची मूर्ती भेट दिली.
