आगीपासून वाहने वाचवताना एक स्थानिक नागरिक जखमी झाला आहे. सुदैवाने या घटनेत कोणतीही जीवितहानी झाल्याचे वृत्त नाही.
गिरगाव, नवाकाळ पथ, मूगभाटमधील उरणकरवाडी नाक्यावर बुधवारी रात्री १२ वाजताच्या सुमारास भीषण आग लागली होती.
या आगीत एका बंद गोदामासह काही भंगार सामान आणि १४ दुचाकी, चारचाकी वाहने जळून खाक झाली आहेत.
आगीपासून वाहने वाचवताना एक स्थानिक नागरिक जखमी झाला आहे. सुदैवाने या घटनेत कोणतीही जीवितहानी झाल्याचे वृत्त नाही.
गोदामात रेक्झिन, फोम, प्लास्टिक, बांबू, लाकडे आदी ज्वलनशील वस्तूंचा साठा होता, त्यामुळेच सदर आग काहीशी भडकली होती. काही स्थानिक नागरिकांनी काही दुचाकी, चारचाकी वाहने आगीपासून वाचवली.
जळत्या गोदामाशेजारील तीन मजली इमारतीमधील रहिवाशांना सुरक्षिततेच्या दृष्टीकोनातून बाहेर काढून सुरक्षित स्थळी हलविण्यात आले होते, अशी माहिती अग्निशमन दलाचे तांत्रिक सल्लागार राजेंद्र चौधरी यांनी दिली.
सदर गोदामाला आग लागली, कशी, आगीचे नेमके कारण काय होते, आगीत किती प्रमाणात वित्तीय हानी झाली याबाबत अग्निशमन दलाचे अधिकारी, स्थानिक पोलीस चौकशी करून माहिती घेत आहेत.
